The news is by your side.

Advertisement

’مریم نواز کی زبان کاٹنے کی دھمکی زرداری کے لیے تھی‘

اسلام آباد: وزیر اطلاعات شبلی فراز کا کہنا ہے کہ ان کے خیال میں مریم نواز کی زبان کاٹنے والی دھمکی شاید آصف علی زرداری کے لیے تھی، تاہم انھوں نے ساتھ ہی ن لیگی خاتون رہنما کی دھمکیوں کی مذمت بھی کی۔

تفصیلات کے مطابق آج نیوز کانفرنس میں گفتگو کرتے ہوئے سینیٹر شبلی فراز نے کہا میرا خیال ہے زبان کاٹنے والی کل کی دھمکی شاید آصف زرداری کے لیے تھی۔

انھوں نے کہا مریم نواز کا بنیادی مقصد 26 مارچ کی نیب طلبی پر کارکنان کو اشتعال دلانا ہے، ان کا لب و لہجہ مایوس کن تھا، ایسی دھمکیاں مریم نواز کے ذہن کی عکاسی کر رہی ہیں، ایک خاتون کرپشن کا جواب دینے کی بجائے لشکر کشی کر رہی ہے، وہ چاہتی ہیں ڈرا دھمکا کر قانون سے فرار حاصل کریں، ہم ان دھمکیوں کی مذمت کرتے ہیں۔

شبلی فراز کا کہنا تھا براڈ شیٹ کمیشن کی رپورٹ آ چکی ہے، قانونی ٹیم اس کا جائزہ لے رہی ہے، جلد براڈ شیٹ کمیشن کی رپورٹ قوم کے سامنے لائیں گے۔

انھوں نے کہا پہلے جو بل قومی اسمبلی میں پاس ہوتا تھا وہ سینیٹ میں رک جاتا تھا، اب تحریک انصاف کی سینیٹ میں اکثریت ہے، اب ہماری کوشش ہوگی کچھ چیزوں میں ترامیم لائیں۔

سینیٹر نے کہا سیاسی پلیٹ فارم کو ذاتی مفاد کے لیے استعمال کرنا خطرناک ہے، انھوں نے ایک سیاسی جماعت کو جرائم پیشہ لوگوں کی آماج گاہ بنا دیا ہے، یہ چاہتے ہیں کوئی بری صورت حال پیدا ہو مگر انھیں اچھے طریقے سے ڈیل کریں گے۔

واضح رہے کہ گزشتہ روز مسلم لیگ ن کی نائب صدر مریم نواز نے مسلم لیگ ن یوتھ ونگ کے زیر اہتمام یوتھ کنونشن میں خطاب میں کہا تھا کہ کسی نے بھی اگر ہمارے قائد میاں نواز شریف کے خلاف غلط زبان استعمال کی تو ہم اب ان کی زبان کھینچ لیں گے۔

Comments

یہ بھی پڑھیں