The news is by your side.

Advertisement

بھارتی کرکٹر شیکھر دھون اور ان کی اہلیہ میں طلاق ہو گئی

نئی دہلی: بھارتی کرکٹر شیکھر دھون اور ان کی اہلیہ عائشہ مکھرجی کے درمیان طلاق ہوگئی۔

تفصیلات کے مطابق بھارتی کرکٹ ٹیم کے بیٹسمین شیکھر دھون اور عائشہ مکھرجی 2012 میں رشتہ ازدواج میں منسلک ہوئے تھے، تاہم 8 سال بعد دونوں کا یہ رشتہ ٹوٹ گیا۔

اس سلسلے میں عائشہ مکھرجی نے اپنے تصدیق شدہ انسٹاگرام اکاؤنٹ پر بتایا کہ ان کے درمیان طلاق ہو گئی ہے، عائشہ نے لکھا کہ کہ وہ ایک بار پھر سے طلاق یافتہ ہو گئیں۔

واضح رہے کہ یہ شیکھر دھون کی پہلی اور باکسر عائشہ مکھرجی کی دوسری شادی تھی، عائشہ کی پہلی شادی بھی طلاق پر منتج ہوئی تھی، عائشہ کا کہنا تھا کہ طلاق کا پہلا تجربہ ڈراؤنا تھا، میں بہت خوف زدہ تھی اور خود کو ناکام محسوس کر رہی تھی۔

انسٹاگرام پوسٹ پر عائشہ مکھرجی نے لکھا طلاق ہونے پر میں نے محسوس کیا تھا جیسے میں نے سب کو مایوس کر دیا ہو اور خود غرضی بھی محسوس کی تھی، میں نے محسوس کیا کہ میں اپنے والدین کو مایوس کر رہی ہوں، اپنے بچوں کو مایوس کر رہی ہوں اور یہاں تک کہ کسی حد تک مجھے ایسا لگا جیسے میں خدا کو مایوس کر رہی ہوں کیوں کہ طلاق بہت بُرا لفظ تھا۔

عائشہ نے لکھا کہ اب مجھے دوسری بار بھی طلاق ہو چکی ہے اور میں پھر وہی سب محسوس کر رہی ہوں لیکن اس بار میں نے خود کو بااختیار محسوس کیا، کیوں کہ طلاق کا مطلب ہے اپنا انتخاب کرنا، اپنے لیے سوچنا اور خود کو تکلیف سے بچانا۔

شیکھر دھون اور عائشہ مکھرجی کا ایک بیٹا بھی ہے، جب کہ پہلے شوہر سے اُن کی دو بیٹیاں تھیں۔

Comments

یہ بھی پڑھیں