ششی کپور کو مداحوں سے بچھڑے ایک سال بیت گیا -
The news is by your side.

Advertisement

ششی کپور کو مداحوں سے بچھڑے ایک سال بیت گیا

ممبئی: بالی ووڈ کے آنجہانی اداکار ششی کپور کو مداحوں سے بچھڑے ایک سال کا عرصہ بیت گیا۔

تفصیلات کے مطابق ششی کپور 18 مارچ 1938 کو کلکتہ میں پیدا ہوئے اُن کے والد پرتھوی راج کپور متحدہ برصغیر کے عظیم اداکار، فلمساز اور تھیٹر آرٹسٹ تھے پرتھوی راج نے لائل پور (موجودہ فیصل آباد) اور پشاورکے تھیٹر میں کام کیا تاہم تقسیم ہند کے بعد وہ اہل خانہ کے ہمراہ ہندوستان منتقل ہوئے۔

ششی کپور نے اپنے والد کی پیروی کرتے ہوئے محض تین سال کی عمر میں اداکاری کے جوہر دکھانا شروع کردیئے اور 1948 سے 1954 کے درمیان چار فلموں میں بہ طور چائلڈ ایکٹر کردار ادا کیا اور شائقین سے داد وصول کی۔

سن 1960 سے 1970 تک بالی ووڈ کو سپر ہٹ فلمیں دینے والے ششی کپور کو مداحوں سے بچھڑے ایک سال کا عرصہ گزر گیا مگر اُن کی یادیں لوگوں کے دلوں میں زندہ ہیں۔

مزید پڑھیں: ششی کپور کی آخری رسومات ادا، امیتابھ ، شاہ رخ اور رنبیر کپور کی بھی شرکت

آپ نے اپنے کریئر کے دوران تقریباً 116 فلموں میں اداکاری کے جوہر دکھائے جن میں ’حسینہ مان جائے گی، پیار کا سندرم، جنون‘ قابل ذکر ہیں۔

آپ کو سن 1976 میں فلم جنون میں اداکاری کی وجہ سے نیشنل ایوارڈ سے بھی نوازا گیا۔

سفر زندگی پر مختصر نظر

فلم سازی اور ہدایت کاری سے واقفیت کے بعد ششی کپور 1961 میں پہلی مرتبہ کسی مرکزی کرادر میں فلم دھرما پترا میں نظر آئے اور پھر پیچھے مڑ کر نہیں دیکھا اس سدا بہار رومانوی اداکار نے کل 116 ہندی فلموں میں اپنے اداکاری کے جوہر بکھیرے جب کہ 55 فلموں میں بڑی کاسٹ کے جھرمٹ میں اپنا لوہا منوایا اور 21 فلموں میں معاون اداکار کے طور پر سامنے آئے اسی طرح 7 فلموں میں مہمان اداکار بن کر پردہ اسکرین پر جلوہ افروز ہوئے۔

ششی کپور نے انگریزی فلموں میں کام کیا اور وہ پہلے بھارتی اداکار تھے جو بین الاقوامی فلم انڈسٹری میں نمائندگی کے لیے گئے اور وہیں تھٹر میں کام کرنے کے دوران ان کی ملاقات غیر ملکی اداکاریہ جنیفر سے ہوئی اور جلد ہی یہ ملاقات محبت میں تبدیل ہو گئی تاہم فلمی کہانی کی طرح اس رومانوی کہانی کو بھی سماج کا سامنا رہا اور کپور خاندان شادی میں رکاوت بنا رہا لیکن محبت کہاں ہار مانتی ہے چنانچہ مشکلات و مصائب کا سامنے کرنے کے بعد بلاخر محبت جیت گئی اور وہ 1958 میں شادی کے بندھن میں بندھ گئے۔

یہ بھی پڑھیں: ششی کپور 79 برس کی عمر میں چل بسے

ششی کپور نے اپنی غیرملکی اہلیہ جنیفر کے ساتھ کئی فلموں میں کام کیا اوراپنی اہلیہ کے ساتھ مل کر  1978 میں اپنے والد کے نام پر پرتھوی تھیٹر کا سنگ بنیاد رکھا تاہم اُن کی اہلیہ جنیفر کا ساتھ زیادہ دیر ساتھ نہ رہا اور وہ کینسر کے مرض میں مبتلا ہو کر 1984 میں داغ مفارقت دے گئیں، ششی کپور نے جنیفر کے انتقال کے بعد اپنے تینوں بچوں کی تن تنہا پرورش کی۔

آسمانِ فن اداکاری کا یہ درخشاں ستارہ 1998 سے فلمی دنیا سے کنارہ کش ہوچکا تھا اور آخری بار وہ بانی پاکستان محمد علی جناح کی زندگی پر بنائی گئی فلم جناح میں نظر آئے۔ وہ 2012 کو پہلی مرتبہ بیماری کے باعث اسپتال میں داخل ہوئے اور ایک روز ہی میں صحت یاب ہوکر گھر لوٹ آئے تاہم 2014 کو دوباہ اسپتال میں داخل ہونے کے بعد سے ان کی طبیعت سنبھل نہ سکی ۔

گزشتہ برس چار دسمبر کو سینے میں انفیکشن کے بعد اسپتال لائے جانے والے اداکارہ جانبر نہ ہوسکے اور  یوں رومانوی اداکاری کا ایک عہد تمام ہوا۔آپ نے  79 سال کی عمر میں دنیا کو الوداع کہا اور فلمی دنیا پر انمٹ نقوش چھوڑے جو  یادوں کو ہمیشہ زندہ رکھیں گے۔

Comments

comments

یہ بھی پڑھیں