راولپنڈی: ورلڈ ٹی ٹوئنٹی اسکواڈ میں نظر انداز کئے جانے والے شعیب ملک نے شاندار اننگز کھیل کر اپنی فٹنس ثابت کردی ہے۔
تفصیلات کے مطابق نیشنل ٹی ٹوئنٹی کپ میں سینٹرل پنجاب کی نمائندگی کرتے ہوئے شعیب ملک نے ایک بار پھر ذمے دار کھلاڑی ہونے کا ثبوت دیا اور مشکل حالات میں انتہائی عمدہ اننگز کھیل کر سینٹرل پنجاب کو دو قیمتی پوائٹنس دلوادئیے۔
نیشنل کپ کے کھیلے جارہے 16ویں میچ میں سینٹرل پنجاب نے پہلے بیٹنگ کا فیصلہ کیا، سندھ نے میچ کے آغاز سے ہی عمدہ بولنگ کرتے ہوئے سینٹرل پنجاب کے کھلاڑیوں کو چلتا کیا، 95 کے مجموعے اسکور پر ان کے 5 کھلاڑی پویلین پہنچ چکے تھے۔
اس موقع پر تجربہ کار آل راونڈ شعیب ملک کا بلا رنز اگلنے لگا، ملک کے سامنے سندھ کے تمام بولرز بے بس نظر آئے انہوں نے میدان کے چاروں اطراف دلکش اسٹروکس کھیل کر اپنی ٹیم کا مجموعہ 168 تک پہنچادیا۔
شعیب ملک نے شاندار نصف سینچری اسکور کرتے ہوئے 47 بالز کے عوض 85 رنز ناٹ آؤٹ کی عمدہ اننگز کھیلی، جس میں پانچ چھکے اور آٹھ چوکے شامل تھے۔
— Pakistan Cricket (@TheRealPCB) October 2, 2021
