لاہور : گھر میں شارٹ سرکٹ کے باعث لگنے والی آگ سے ماں اپنے دو جوان سالہ بیٹوں کے ساتھ جھلس کر جاں بحق جبکہ دو بیٹے دم گھٹنے سے بیہوش ہو گئے۔
تفصیلات کے مطابق لاہور کے علاقے نشاط کالونی کی رہائشی شکیلہ بی بی اپنے اہل خانہ کے ساتھ گھر میں سو رہی تھی کہ اسٹیبلائزر سے شارٹ سرکٹ ہوا اور دیکھتے ہی دیکھتے پورا مکان شعلوں کی لپیٹ میں آ گیا۔
آگ اتنی شدید تھی کہ علاقہ مکینوں کی کوشش کے بعد بھی اس پر قابو نہیں پایا جاسکا، بروقت اطلاع دینے کے باوجود پولیس اور فائر بریگیڈ کے عملے نے حسب معمول آنے میں دیرکردی۔
عینی شاہدین کے مطابق پولیس اور فائربریگیڈ کی گاڑیاں تاخیر سے پہنچیں اگر بروقت پہنچ جاتیں تو انسانی جانیں بچائی جا سکتی تھیں۔
عینی شاہدین کا مزید کہنا تھا کہ آگ لگنے سے شکیلہ اور اس کے بیٹے اویس اور سجاد جاں بحق جبکہ دوبیٹے بے ہوش ہو گئے، پولیس نے قانونی کارروائی کے بعد لاشیں ورثاء کے حوالے کر دیں۔
