سڈنی : آسٹریلیا کے شہر سڈنی میں گھر کے اندر مردہ حالت میں ملنے والی دو سعودی لڑکیوں کی شناخت ہوگئی، پولیس نے اہل خانہ کو اطلاع دے دی۔
غیر ملکی خبر رساں ادارے کی رپورٹ کے مطابق آسٹریلیا میں پولیس نے ایک ماہ قبل سڈنی کے مضافاتی علاقے میں قائم ایک فلیٹ میں مردہ پائی جانے والی دو سعودی لڑکیوں کی شناخت کرلی ہے۔
سعودی عرب سے تعلق رکھنے والی دونوں لڑکیاں مغربی سڈنی کے مضافاتی علاقے بیرووڈ کے اپنے فلیٹ میں ایک ماہ قبل پراسرار حالات میں مردہ پائی گئی تھیں۔
میڈیا رپورٹس کے مطابق آسٹریلوی پولیس نے کہا ہے کہ 24 سالہ اسرا عبداللہ السھلی اور 23 سالہ اس کی چھوٹی بہن امال کی میتیں ایک ماہ قبل ان کے فلیٹ سے ملی تھیں۔
پولیس نے ایک بار پھر عوام سے اپیل کی ہے کہ وہ مذکورہ حادثے کے حوالے سے جو معلومات ان کے پاس ہوں فراہم کریں۔
سڈنی میں واقع سعودی قونصل خانے نے حادثے کے موقع پر جاری میں کہا تھا کہ اسے سڈنی میں دو سعودی لڑکیوں کی موت کی رپورٹ ملی ہے۔
اس افسوسناک واقعے کی تفصیلات اور اسباب دریافت کرنے کے لیے متعلقہ حکام سے رجوع کرلیا گیا ہے۔ متوفی لڑکیوں کے اہل خانہ کو بھی واقعے کی اطلاع دے دی گئی ہے۔