The news is by your side.

Advertisement

لاک ڈاؤن: پٹرول اور ڈیزل کی کھپت میں نمایاں کمی

کراچی: کرونا وائرس کی روک تھام کے لیے نافذ لاک ڈاؤن کے دوران پٹرول اور ڈیزل کی کھپت میں نمایاں کمی واقع ہو گئی ہے۔

اے آر وائی نیوز کے مطابق پٹرولیم انڈسٹری کی رپورٹ میں کہا گیا ہے کہ اپریل 2019 کے مقابلے میں اپریل 2020 میں پٹرول کی کھپت 36 فی صد کم رہی۔

رپورٹ میں کہا گیا ہے کہ اپریل 2020 میں پٹرول کی کھپت 4 لاکھ 40 ہزار ٹن رہی، گزشتہ سال اپریل میں پٹرول کی کھپت 6 لاکھ 80 ہزار ٹن رہی تھی، اپریل 2019 میں ڈیزل کی کھپت میں بھی 16 فی صد کمی واقع ہوئی ہے، اپریل 2020 میں ڈیزل کی فروخت 5 لاکھ 50 ہزار ٹن رہی جب کہ اپریل 2019 میں ڈیزل کی فروخت 6 لاکھ 50 ہزار ٹن رہی تھی۔

مارچ میں بھی پیٹرولیم مصنوعات کی فروخت میں نمایاں کمی

رپورٹ کے مطابق اپریل 2020 میں پٹرولیم مصنوعات کی مجموعی فروخت بھی 35 فی صد کم رہی، اپریل 2020 میں مجموعی فروخت 10 لاکھ 70 ہزار ٹن رہی، گزشتہ سال اپریل کی فروخت 16 لاکھ 50 ہزار ٹن رہی تھی۔

رواں مالی سال پہلے 10 ماہ میں پٹرولیم مصنوعات کی فروخت میں 13 فی صد کمی آئی، اس دوران پٹرولیم مصنوعات کی فروخت ایک کروڑ 33 لاکھ 50 ہزار ٹن رہی۔

یاد رہے حکومت کی جانب سے مئی کے لیے پٹرول کی فی لیٹر قیمت میں 15 روپے کمی کا اعلان کیا گیا ہے، جس کے بعد نئی قیمت 81 روپے 58 پیسے ہو گئی ہے۔ ہائی اسپیڈ ڈیزل میں 27 روپے 15 پیسے کی کمی کی گئی جس کے بعد فی لیٹر قیمت 80 روپے 10 پیسے ہو گئی ہے۔

Comments

یہ بھی پڑھیں