The news is by your side.

Advertisement

سندھ بھر میں کل سے پلاسٹک بیگز کے استعمال پر پابندی ہوگی

کراچی : سندھ میں پلاسٹک بیگز کے استعمال کا آج آخری دن ہے ، کل سے صوبے بھر میں پلاسٹک بیگز کی تیاری، فروخت اور استعمال پر پابندی ہوگی، مرتضیٰ وہاب نے کہا شہری کپڑے یا کاغذ کے تھیلے استعمال کریں، پابندی کی خلاف ورزی پر سزا ملے گی۔

تفصیلات کے مطابق سندھ میں کل سے پلاسٹک بیگز کے استعمال، فروخت اور تیاری پر پابندی عائد ہوگی ، محکمہ ماحولیات سندھ نے پابندی کا نوٹیفکیشن جاری کردیا ہے۔

جس میں کہا گیا ہے کہ پلاسٹک بیگ کی تیاری فروخت اور استعمال قابل سزا جرم ہوگا ، قوانین کی خلاف ورزی پر قواعد کے تحت مقدمہ، گرفتاری و سزا ہوگی۔

محکمہ ماحولیات پلاسٹک بیگ کے استعمال کےخلاف قوانین پر عمل کرانے کا پابند ہے۔

سندھ حکومت کے ترجمان اور مشیر ماحولیات بیرسٹر مرتضی وہاب نے کہا ہے کہ   پلاسٹک کی تھیلیاں ماحولیاتی آلودگی کا بڑا سبب ہیں، یہ تھیلیاں کراچی کے سیوریج نالوں کی بندش کی بھی ایک وجہ ہیں۔

محکمہ ماحولیات سندھ نے رواں برس اگست میں پلاسٹک بیگز پر پابندی کا اعلان کیا تھا اور کہا تھا پلاسٹک بیگز پر پابندی کے اعلان پر عملدرآمد 2 ماہ بعد شروع کردیا جائے گا۔

مزید پڑھیں : سندھ حکومت کا پلاسٹک کی تھیلیوں پر پابندی کا اعلان

مرتضی وہاب کا کہنا تھا کہ  پابندی پر عمل نہ کرنے والوں کے خلاف قانونی کارروائی کی جائے گی ، ماحولیاتی ٹیمیں مختلف مارکیٹوں کا دورہ کریں گی، شہری کپڑے یا کاغذ کے تھیلے استعمال کریں۔

انھوں  نے مزید کہا کہ پلاسٹک کی تھیلیاں بنانے والے کارخانوں نے بھی مہم کی حمایت کررکھی ہے، عوام الناس سے بھی پلاسٹک بیگز کا استعمال ترک کرنے کی درخواست کرتے ہیں، عوام کے تعاون کے بغیر حکومت تنہا کچھ نہیں کرسکتی۔

Comments

comments

یہ بھی پڑھیں