The news is by your side.

Advertisement

سندھ حکومت کا تمام سرکاری لائبریریاں کھولنے کا فیصلہ

کراچی: سندھ حکومت نے کل سے صوبے کی تمام سرکاری لائبریریاں کھولنے کا فیصلہ کر لیا۔

تفصیلات کے مطابق سندھ حکومت کل سے صوبے میں تمام سرکاری لائبریریاں کھولنے جا رہی ہے، اس سلسلے میں محکمہ ثقافت نے کہا ہے کہ سرکاری لائبریریاں ایس او پیز کے تحت کل سے کھول دی جائیں گی۔

کرونا کے پیش نظر 2 مارچ کو محکمہ ثقافت نے تمام سرکاری لائبریریاں بند کر دی تھیں، کل سے صوبے کے اسکولوں کے ساتھ ساتھ سرکاری لائبریریاں بھی کھولی جائیں گی۔

واضح رہے کہ کل سے ملک بھر میں اسکول کھلنے جا رہے ہیں تاہم محکمہ تعلیم سندھ کی جانب سے سرکاری اسکولوں کو کتب کی فراہمی تاحال نہیں کی جا سکی ہے۔

سندھ ٹیکسٹ بک بورڈ سرکاری اسکولوں کے لیے کتب کی چھپائی اور ترسیل میں ناکام ہو گیا ہے، کتب نیا تعلیمی سال شروع ہونے سے قبل طلبہ کو فراہم کی جانی تھیں۔

سرکاری اسکولوں کو کتب کی فراہمی نہ ہوسکی، طلبا بغیر کتابوں کے جائیں گے

ذرایع کا کہنا ہے کہ سرکاری اسکولوں کو مفت کتب فراہم نہ ہو سکیں، سندھ ٹیکسٹ بک بورڈ نے کتب کی چھپائی کے لیے نجی پبلشر کو رقم ادا نہیں کی، رقم نہ ملنے سے نجی پبلشر نے سرکاری کتب کی چھپائی 40 فی صد کم کر دی، سندھ ٹیکسٹ بک بورڈ کی شائع کردہ کتابیں بھی طلبہ تک نہیں پہنچ سکی ہیں۔

صورت حال کے مطابق کل سے شروع تعلیمی سیشن میں طلبہ کو بغیر کتابوں کے اسکول جانا پڑے گا، نویں دسویں کے علاوہ انٹر کی سطح کی کتب بھی دستیاب نہیں، نویں دسویں کی صرف مطالعہ پاکستان اور سندھی کی کتب فراہم کی گئی ہیں۔

Comments

یہ بھی پڑھیں