کراچی، سندھ فوڈ اتھارٹی کا ایمپریس مارکیٹ میں چھاپہ، 2500 کلو مضر صحت گوشت تلف
The news is by your side.

Advertisement

کراچی، سندھ فوڈ اتھارٹی کا ایمپریس مارکیٹ میں چھاپہ، 2500 کلو مضر صحت گوشت تلف

کراچی: سندھ فوڈ اتھارٹی نے کراچی کی ایمپریس مارکیٹ میں چھاپہ مار کر 2500 کلو مضر صحت گوشت تلف کردیا، پنجاب فوڈ اتھارٹی نے بھی ناقص اشیائے خوردونوش تلف کردیں۔

تفصیلات کے مطابق پنجاب کے ساتھ اب سندھ میں بھی فوڈ اتھارٹی متحرک ہوگئی ہے، کراچی کی ایمپریس مارکیٹ میں چھاپہ مار کر ڈھائی ہزار کلو مضر صحت گوشت قبضے میں لے کر تلف کردیا گیا۔

ایمپریس مارکیٹ میں کئی روز پرانا گوشت بیچا جارہا تھا، ڈائریکٹر فوڈ اتھارٹی ڈاکٹر ابرار شیخ کے مطابق غیرمعیاری گوشت کئی دکانوں پر فروخت کے لیے رکھا گیا تھا، چھاپے کے دوران پتا چلا کئی دکانوں پر بکرے، گائے اور دنبے کا فریز کیا ہوا گوشت بھی فروخت ہورہا تھا۔

فوڈ اتھارٹی حکام نے کہا کہ غیرمعیاری گوشت فراہم کرنے والے دکانداروں کے خلاف قانونی کارروائی عمل میں لائی جائے گی۔

دوسری جانب پنجاب فوڈ اتھارٹی نے بھی دودھ کے نام پر زہر پلانے والوں کے خلاف کارروائی کرتے ہوئے 5750 لیٹر ملاوٹ شدہ اور غیر معیاری دودھ ضائع کردیا ہے۔

گوجرانوالہ میں پنجاب فوڈ اتھارٹی نے کولڈ اسٹوریج میں رکھے 2 لاکھ سے زیادہ گندے انڈے برآمد کرکے تلف کردئیے ہیں۔

واضح رہے کہ تین ماہ قبل سندھ فوڈ اتھارٹی نے شہر قائد کے علاقے کورنگی میں زہر آلود مٹھائیاں بنانے والے غیر قانونی فیکٹریوں پر چھاپہ مار کارروائی کرتے ہوئے مالکان کو رنگے ہاتھوں گرفتار کرلیا تھا۔

ڈاکٹر ابرار شیخ کا کا کہنا تھا کہ عوام کی صحت سے کھیلنے کی اجازت کسی کو نہیں دی جاسکتی، تاجر طبقے کو چھاپے مار کر خوفزدہ نہیں کرنا چاہتے، لیکن اپنی ذمہ داری بخوبی نبھائیں گے۔

Comments

comments

یہ بھی پڑھیں