The news is by your side.

Advertisement

سرکلر ریلوے: سندھ حکومت کی متاثرین کو متبادل جگہ فراہم کرنے کی یقین دہانی

کراچی: سندھ حکومت کی جانب سے کراچی سرکلر ریلوے کے متاثرین کو متبادل جگہ فراہم کرنے کی یقین دہانی کرا دی گئی۔

تفصیلات کے مطابق آج سرکلر ریلوے کے متاثرین سے وزیر بلدیات سعید غنی، مشیر برائے اطلاعات مرتضیٰ وہاب اور وزیر توانائی سندھ امتیاز شیخ نے ملاقات کی۔

سرکلر ریلوے کے متاثرین کراچی پریس کلب کے باہر مظاہرہ کر رہے تھے، حکومتی عہدیداروں نے پریس کلب جا کر ان سے ملاقات کی۔

وزیر بلدیات سعید غنی نے متاثرین سے کہا کہ کل سرکلر ریلوے کے لیے جاری آپریشن رکوانے کے لیے حکام سے بات کی جائے گی۔

صوبائی وزیر کا کہنا تھا کہ سندھ حکومت متاثرین کو ہر ممکن سہولت فراہم کرنے کو تیار ہے۔ سعید غنی نے یہ بھی کہا کہ حکومت کی جانب سے متاثرین کو فوری ریلیف دینے کی کوشش کی جا رہی ہے۔

یہ بھی پڑھیں:  کراچی سرکلر ریلوے بحالی کے لیے تجاوزات ہٹانے کا کام جاری

واضح رہے کہ کراچی میں عدالتی حکم پر سرکلر ریلوے کی بحالی کے لیے تجاوزات ہٹائی جا رہی ہیں، اس سلسلے میں متعدد علاقوں میں جہاں سے ریل کی پٹریاں گزر رہی تھیں، غیر قانونی تجاوزات ہٹائی جا چکی ہیں، جس کے متاثرین احتجاج کر رہے ہیں کہ ان سے سر چھپانے کی چھت چھینی گئی ہے۔

خیال رہے کہ مختلف گنجان آبادیوں سے گزرنے پر پٹریوں کے اطراف میں گزشتہ کئی دہائیوں کے دوران بننے والے کچے پکے مکانات کو آخر کار گرایا جا رہا ہے، ان پٹریوں پر کئی دہائیوں سے ٹرین نہیں چلی، لوگوں نے اس کے آس پاس گھر بنا لیے تھے۔

Comments

comments

یہ بھی پڑھیں