کراچی (9 جنوری 2026): وزیراعلیٰ کے پی سہیل آفریدی کا کراچی پہنچنے پر سندھ حکومت کی جانب سے صوبائی وزیر سعید غنی نے استقبال کیا۔
اے آر وائی نیوز کے مطابق وزیراعلیٰ خیبر پختونخوا سہیل آفریدی چار روزہ دورہ سندھ کے لیے کراچی پہنچ گئے ہیں۔ جناح انٹرنیشنل ایئرپورٹ پر جہاں پی ٹی آئی کی مقامی قیادت اور کارکنوں نے استقبال کیا، وہیں سندھ حکومت کی نمائندگی بھی وہاں موجود تھی۔
بلاول بھٹو کی ہدایت پر صوبائی وزیر سعید غنی نے کراچی ایئرپورٹ پہنچ کر وزیراعلیٰ خیبر پختونخوا سہیل آفریدی کا استقبال کیا۔
اس موقع پر انہوں نے سہیل آفریدی اور ان کے ساتھ آنے والے ارکان کو روایتی تحائف سندھی ٹوپی اور اجرک پہنائی۔
سُہیل آفریدی کا کراچی پہنچنے پر شاندار استقبال، پیپلزپارٹی کے رہنما سعید غنی نے سندھی اجرک اور ٹوپی پہنائی۔۔!! pic.twitter.com/UUP6Yzd2iu
— Khurram Iqbal (@khurram143) January 9, 2026
سعید غنی نے انہیں پارٹی چیئرمین کی جانب سے خیر سگالی کا پیغام پہنچایا اور کہا کہ سندھ آمد پر آپ کو خوش آمدید کہتے ہیں۔ آپ کو ہر قسم کی سیاست کی اجازت ہے۔
دریں اثنا پیپلز پارٹی کے چیئرمین بلاول بھٹو زرداری نے پی ٹی آئی کو کراچی میں جلسہ کرنے کی اجازت دینے کی ہدایت کر دی ہے۔
