کراچی: سندھ حکومت نے سرکاری ملازمتوں کے حصول کے لیے عائد کی جانے والی سرکاری مدت کی حد میں 15 سال کا اضافہ کردیا۔
تفصیلات کے مطابق سندھ حکومت نے جمعے کے روز سرکاری ملازمت حاصل کرنے کے لیے عائد کی جانے والی مدت کو 15 سال بڑھانے کی منظوری دیتے ہوئے نوٹی فکیشن جاری کیا۔
حکومت کی جانب سے جاری نوٹی فکیشن کے مطابق سرکاری ملازمتیں حاصل کرنے والے خواہش مند افراد کو 15 سال تک کی چھوٹ ہوگی، جس کا اطلاق محکمہ پولیس، پبلک سروس کمیشن اور مخصوص اداروں پر نہیں ہوگا۔
عمر کی حد میں اضافے کا اطلاق جون 2020 تک ہوگا۔
نوٹی فکیشن میں کہا گیا ہے کہ وزیراعلیٰ سندھ نے سول سروس رول 1974 کی شق 12 کے تحت قانون کی منظوری دی۔
واضح رہے کہ اس سے قبل سرکاری ملازمت حاصل کرنے کی مقررہ عمر 30 برس تھی، سندھ حکومت کی منظوری کے بعد اب خواہش مند 45 برس کی عمر تک ملازمت حاصل کرنے کی درخواست دے سکتا ہے۔