کراچی : سندھ ہائی کورٹ نے اسکولوں کو اپ گریڈ کرنے کا حکم دے دیا، عدالت نے محکمہ ترقیات و منصوبہ بندی کے اعتراضات مسترد کردیے۔
سندھ ہائی کورٹ میں اسکولوں کو اپ گریڈ کرنے کے حوالے سے کیس کی سماعت ہوئی، عدالت نے سندھ بھر کے100ہائی اسکولوں کو اپ گریڈ کرنے کا حکم دے دیا۔ عدالت نے حکم جاری کیا کہ اپ گریڈڈ تمام اسکولز میں انٹرمیڈیٹ تک تعلیم دی جائے گی۔
اس موقع پر وکیل کا کہنا تھا کہ محکمہ ترقیاتی ومنصوبہ بندی نے اپ گریڈیشن معاملے پراعتراضات کئے ہیں، جس پر عدالت نے محکمہ ترقیات و منصوبہ بندی کے اعتراضات مسترد کردیے۔
عدالت نے حکم دیا کہ اپ گریڈیشن کی سمری دو روز میں محکمہ منصوبہ بندی کو ارسال کریں جس کے بعد محکمہ ترقیات سمری پر10روز میں کام مکمل کرکے سیکریٹری خزانہ کو ارسال کرے۔
عدالت نے سیکٹری خزانہ کو15روز میں اپ گریڈیشن کا نوٹی فکیشن جاری کرنے کا حکم جاری کرتے ہوئے کہا کہ اسکولز و کالجز میں انتظامی عہدوں پر تعینات اساتذہ کو ہفتے میں کلاسز لیں۔
جسٹس صلاح الدین پنہور کا کہنا تھا کہ اساتذہ کا اصل کام پڑھانا ہے، پروفیسرز، اسسٹنٹ پروفیسرز، سب اسپیشلسٹ انتظامی عہدوں کے ساتھ طلباء و طالبات کو پڑھائیں۔ بعد ازاں عدالت نے مزید سماعت آئندہ ماہ تک ملتوی کردی۔
