جکارتہ : والدہ کو ٹیلنٹ شو کے اگلے راؤنڈ میں پہنچنے کی اطلاع دینے والی لڑکی کو جب معلوم ہوا کہ چند لمحے قبل والدہ فوت ہوچکی ہیں تو لائیو نشریات میں دوشیزہ زار و قطار رو پڑی۔
غیر ملکی خبر رساں ادارے کی رپورٹ کے مطابق یہ دل دہلا دینے والا واقعہ انڈونیشیا میں اس وقت پیش آیا جب ایک ٹیلنٹ شو میں شرکت کرنے والی ایک 14 سالہ لڑکی نے اگلے راؤنڈ میں پہنچنے کی خوشخبری دینے کے لیے اپنی بیمار والدہ کو فون کیا۔
جناح نامی انڈونیشن دوشیزہ نے اپنی والدہ کے ذیابیطس کے علاج کےلیے فنڈ جمع کرنے کی نیت سے لیگا ڈینگڈٹ نامی ٹیلنٹ شو میں شرکت کا فیصلہ کیا تھا جس میں کامیاب ہونے والے امیدوار کو 28 ہزار پاؤنڈ کی خطیر رقم انعام میں دی جانی تھی۔
جناح کی کارکردگی نے ججوں پر سحر طاری کردیا جس کے باعث وہ مقابلے کے اگلے مرحلے میں پہنچنے میں کامیاب ہوگئیں جس کے بعد انہوں نے یہ خوشخبری اپنی والدہ کو سنانے کا فیصلہ کیا اور والدہ کو فون کیا۔
تاہم دوشیزہ کی خوشی اس وقت غم میں بدل گئی جب اس کے چچا نے فون اٹھاکر دل دہلا دینے والی خبر جناح کو سنائی کہ تمہاری والدہ انتقال کرچکی ہیں۔
فون اسپیکر پر تھا جس کی آواز براہ راست نشریات دیکھنے والے بھی سن سکتے تھے، چچا نے کہا کہ "جناح تمہاری والدہ چاہتی تھیں تم مضبوط بنوں کیونکہ اب تمہیں پورے کنبے کی دیکھ بھال کرنی ہے”۔
انہوں نے اپنی بھتیجی سے کہا کہ "ہم اسے کنبے کے فرد کی حیثیت سے محبت کرتے تھے لیکن اللہ تمہاری والدہ سے ہم سب سے زیادہ محبت کرتا تھا اسی لیے اس نے اسے طلب کرلیا۔ آپ کی والدہ فوت ہوچکی ہیں”۔
والدہ کی موت کی خبر کی سن کر آنسوؤں نے دوشیزہ کے رخساروں کو بھگونا شروع کیا وہ شدت جذبات پر قابو نہ رکھ سکی اور لائیو نشریات کے دوران ہی زار و قطار رونے لگی جبکہ شو کے ججز بھی روتے ہوئے جناح کے گرد جمع ہوگئے۔
غیر ملکی میڈیا کا کہنا تھا کہ درد ناک فون کال کا ویڈیو کلپ انڈونیشیا کے مشہور گلوکار عظیم کمروزالزمان نے اپنے ٹوئٹر پر بھی شیئر کیا، جسے اب تک ڈھائی لاکھ مرتبہ دیکھا جاچکا ہے۔
گلوکار عظیم کمروزالزمان نے اپنے ٹوئٹر اکاؤنٹ پر لکھا کہ صرف 14 سالہ لڑکی پہلی ہی مرتبہ لیگا ڈینگڈٹ انڈونیشیا 2020 کے اگلے مرحلے پہنچی اور اپنی والدہ کو اچھی خبر دینے کےلیے فون کیا لیکن چچا نے انتہائی درد ناک خبر سنا دی۔
