امیر جماعت اسلامی پاکستان سراج الحق نے پی ڈی ایم قائدین پر تنقید کرتے ہوئے کہا ہے کہ یہ بدمعاش ہیں، سپریم کورٹ اور نیب ان کا احتساب نہیں کر سکتے۔
ملتان میں ورکرز کنونشن سے خطاب میں سراج الحق نے کہا کہ یہ اور مخلوق ہے جو اپنے آپ کو آقا اور عوام کو غلام سمجھتے ہیں، ملک میں مہنگائی ہے اور ہمارے وزیر اعظم شہباز شریف بھی رو رہے ہیں، ذمہ دار کون ہے کس نے پاکستان کو برباد کیا؟
سراج الحق نے کہا کہ ’آج بھی وزیر خزانہ اسحاق ڈار نے پیٹرول کی قیمت میں 35 روپے اضافہ کیا اب آٹے کی قیمت میں بھی اضافہ ہوگا۔ سینیٹ اور اسمبلیوں میں بھی یہ ہی لوگ موجود ہیں۔ یہ حکمران ریلوے، ایئرپورٹ اور مزار قائد تک کو بیچنا چاہتے ہیں۔‘
انہوں نے کہا کہ مہنگائی سے تنگ لوگوں کے پاس اب دو راستے ہیں کہ رونا دھونا کریں یا پھر ظالم نظام سے ٹکرائیں۔
ان کا کہنا تھا کہ یہ دوبارہ آئیں گے اس بچے ہوئے پاکستان کو بھی نہیں چھوڑیں گے، کبھی نواز شریف کبھی عمران خان اور اب شہباز شریف بھی کہے گا کہ کیوں نکالا مجھے۔
