فیصل آباد: صوبہ پنجاب کے شہر فیصل آباد میں کورونا کے مریضوں میں اضافے کے پیش ںظر دوہفتے کے لئے اسمارٹ لاک ڈاؤن نافذ کردیا ہے۔
تفصیلات کے مطابق صوبہ پنجاب کے شہر فیصل آباد کے چار علاقوں میں دوہفتے کے لئے اسمارٹ لاک ڈاؤن نافذ کردیا گیا۔
محکمہ صحت نے بتایا کہ کورونا کے 81 مریض ہونے پر اسمارٹ لاک ڈاؤن کا فیصلہ کیا ، علاقوں میں زکریا پارک، حمید پارک، کرسچین کالونی اور رحیم گارڈن شامل ہیں۔
محکمہ صحت کا کہنا تھا کہ چاروں آبادیوں میں 24 فروری تک پابندیوں پرعملدرآمد ہوگا، زکریا پارک میں کورونا کے سب سے زیادہ 55کیسز رپورٹ ہوئے۔
یاد رہے ملک میں چوبیس گھنٹے میں کورونا کے مزید انتالیس مریض انتقال کرگئے، این سی او سی کے مطابق چوبیس گھنٹے میں اٹھاون ہزار ستتر کورونا ٹیسٹ کیے گئے، جس میں مزید تین ہزار چار سو اٹھانوے افراد میں کورونا وائرس کی تصدیق ہوئی۔
ایک دن میں کورونا کے ٹیسٹ مثبت آنے کی شرح چھ اعشاریہ صفر دو فیصد رہی جبکہ کورونا کے سولہ سو تریسٹھ مریض انتہائی نگہداشت میں زیر علاج ہیں۔
