اسلام آباد: ملک میں کم آمدنی والے افراد کو موبائل فون فراہم کرنے کے لیے آسان اقساط پر اسمارٹ فون فراہم کرنے کی اسکیم شروع کردی گئی۔
تفصیلات کے مطابق وفاقی وزیر برائے انفارمیشن ٹیکنالوجی و ٹیلی کمیونی کیشن سید امین الحق نے عوام کے لیے بڑا اقدام اٹھاتے ہوئے اسمارٹ فون فار آل کے تحت کم آمدنی والے افراد کے لیے آسان اقساط پر موبائل فونز اسکیم کا اجرا کردیا۔
اسکیم عالمی ادارے جی ایس ایم اے کے تعاون سے مقامی کمپنی قسط پے کی جانب سے جاری کی گئی ہے۔
اجرا کی تقریب سے خطاب کرتے ہوئے وفاقی وزیر امین الحق نے خطاب کرتے ہوئے کہا کہ اسکیم کے تحت 20 سے 30 فیصد ادائیگی پر کوئی بھی فرد موبائل حاصل کر سکے گا۔
انہوں نے کہا کہ اسکیم کا مقصد عام آدمی تک فون پہنچانا اور چھوٹے کاروباری افراد کو ای کامرس کی جانب لانا ہے۔
امین الحق کا کہنا تھا کہ کسی ضمانت یا طویل کاغذی کارروائی کے تحت صرف شناختی کارڈ پر موبائل کا حصول یقینی بنا رہے ہیں، ابتدائی طور پر 10 ہزار سے 1 لاکھ روپے مالیت کے فون 3 سے 12 ماہ کی اقساط میں دیے جائیں گے۔
انہوں نے کہا کہ موبائل میں جدید سافٹ ویئر ہوگا، عدم ادائیگی پر فون لاک ہوجائے گا اور کہیں استعمال نہیں ہوسکے گا۔
وفاقی وزیر کا کہنا تھا کہ ملک میں کنیکٹوٹی سہولیات کے لیے 65 سے 70 ارب روپے سے زائد کے پروجیکٹس ہیں، کنیکٹوٹی کے ساتھ اسمارٹ فونز کی دستیابی یقینی بنانے کے لیے مذکورہ اسکیم کا اجرا کیا گیا ہے۔
