اسلام آباد : نگران وفاقی وزیر داخلہ سرفراز بگٹی نے واضح الفاظ میں کہا ہے کہ یہ بات طے ہے کہ اب ملک میں اب اسمگلنگ اور ذخیرہ اندوزی نہیں ہوگی۔
اسلام آباد میں پریس کانفرنس سے خطاب کرتے ہوئے انہوں نے کہا کہ چینی کی اسمگلنگ روکنے کے بعد اب ذخیرہ اندوزی شروع ہوگئی ہے، جس کیخلاف آپریشن کیا جائے گا، حکومت نے ان برائیوں کے خلاف انتہاتک جانے کا فیصلہ کرلیا ہے۔
ان کاکہنا تھا کہ اسمگلنگ اور ذخیرہ اندوزوں کیخلاف آپریشن کی ہفتہ وار تفصیلات جاری ہوں گی، آپریشن پر چیک اینڈ بیلنس رکھا جائے گا، یہ بات طے ہے کہ اب ملک میں اب اسمگلنگ اورذخیرہ اندوزی نہیں ہوگی۔
ایک سوال کے جواب میں ان کا کہنا تھا کہ کتنی بڑی مچھلی ہی کیوں نہ ہو اسے نہیں بخشا جائے گا، ماضی میں جو کچھ ہوا اس پر بحث لاحاصل ہے، ہم آج کی بات کررہے ہیں ۔ایف آئی اے کی کارروائیوں سے متعلق ان کا کہنا تھا کہ حوالہ ہنڈی کے خلاف 48 چھاپے مارے جن میں 59 ملزمان کو حراست میں لیا گیا اور 48 مقدمات درج کیے گئے۔
سرفرازبگٹی نے کہا کہ دہشت گردوں کو پاک فوج بھرپور طریقے سے جواب دے رہی ہے، چترال کے لوگوں نے جس طرح پاک فوج کے شانہ بشانہ ملکی سرحد کا دفاع کیا وہ مثالی ہے،
کسی کو بندوق کے زور پر امن و امان برباد نہیں کرنے دیں گے۔
ایک سوال کے جواب میں ان کا کہنا تھا کہ ہمارا ملک اب غیرقانونی تارکین وطن کا بوجھ نہیں اٹھاسکتا، ان لوگوں کو اب اپنے ملک واپس جانا پڑے گا، اب ریاست غیرقانونی کام کرنے والوں کو نہیں چھوڑے گی.
ان کا مزید کہنا تھا کہ کالعدم ٹی ٹی پی کے دہشت گرد افغانستان سے ہی آئے تھے حالانکہ افغانستان نے معاہدہ کیا تھا اپنی سرزمین کسی کیخلاف استعمال نہیں ہونے دے گا، جس نے بھی حملہ کیا بھرپور جواب دیں گے، اب ہمارا ردعمل نظر آئے گا۔
