برازیل کے ایک دریا کی ایسی قابل ذکر تصاویر سامنے آئی ہیں، جن میں ایک بڑے مگرمچھ اور ایک ایناکونڈا کے درمیان زبردست جنگ دکھائی دیتی ہے۔
سانپ نے خود کو مگرمچھ کے گرد اس طرح لپیٹا کہ اس کے لیے ہلنا بھی مشکل ہو گیا، یہ جنگ دریائے کویابا کے کنارے بقا کے لیے لڑی گئی 40 منٹ کی ڈرامائی لڑائی ثابت ہوئی۔
لڑائی اس وقت شروع ہوئی جب ایناکونڈا اور گھڑیال اپنے اپنے شکار ڈھونڈنے کے چکر میں ایک دوسرے کے آمنے سامنے آگئے، خوف ناک جانوروں کے اس مقابلے کے یہ نایاب مناظر امریکی ریاست انڈیانا سے تعلق رکھنے والی ایک وائلد لائف فوٹوگرافر کِم سولیوِن نے اپنے کیمرے میں محفوظ کیے۔
خونخوار جانوروں کی اپنی بقا کے لیے یہ جنگ 40 منٹ تک جاری رہی، مگرمچھ نے ایناکونڈا کو پکڑا تو اس نے بھی پانی میں لے جانے سے پہلے مگرمچھ پر اپنی گرفت مضبوط کر لی، اور خود کو اس کے گرد لپیٹ لیا۔
جہاں مگرمچھ اپنے آپ کو ایناکونڈا کی گرفت سے بچانے کی کوشش کرتا رہا، وہیں خطرناک سانپ کا پانی میں رہنا مشکل ہو گیا، جب مگرمچھ اسے پانی کے اندر لے گیا تو وہ سانس لینے کے لیے اپنا سر اوپر نکالتا رہا۔
خاتون کا کہنا تھا کہ سانپ کو اپنے قاتل دانتوں میں دبوچنے کی کوشش کرنے والا مگرمچھ اسے آخر کار پانی میں لے گیا، کچھ ہی دیر بعد دونوں پانی میں کافی دیر کے لیے غائب ہوگئے۔
کم سولیون نے بتایا کہ اچانک مگرمچھ پانی سے باہر نکلا لیکن اس بار وہ اکیلا تھا، لگ رہا تھا کہ وہ یہ جنگ جیت چکا ہے، اور سانپ کو آخر کار اپنی غذا بنا لیا ہے۔
تاہم کچھ ہی دیر بعد ایناکونڈا بھی پانی کی سطح پر نمودار ہوا اور ایک طرف تیرتا ہوا چلا گیا۔
