استنبول: ترکی میں جاری شدید برفباری سے فلائٹ آپریشن بری طرح متاثر ہونے کے باعث 300 سے زائد مسافر استنبول میں پھنس گئے ہیں۔
تفصیلات کے مطابق استنبول میں شدید برفباری کا سلسلہ جاری ہے، جس کی وجہ سے نظام زندگی بری طرح مفلوج ہوکر رہ گیا ہے، پچھلے تین روز سے ہونے والی برفباری کے نتیجے میں ایک لاکھ 30 ہزار مسافر متاثر ہوئے ہیں جبکہ تین روز سے پاکستان سے آنے والی 8 پروازیں بھی منسوخ ہوگئی ہیں۔
برفباری کے باعث عمارتیں، گلیاں، سڑکیں گاڑیاں برف سے ڈھک گئیں ہیں۔
موسم کی خرابی کو مدنظر رکھتے ہوئے ایئرپورٹ حکام نے تمام فلائٹ آپریشن معطل کر دئیے ہیں کیونکہ رن وے پر موجود برف دوران لینڈنگ کسی بڑےحادثے کا سبب بن سکتی ہے۔
حکام کے مطابق اب تک 16انچ برفباری ریکارٖڈ کی گئی ہے اور شدید موسم کی وجہ سے باسفورس کی بندرگاہ کو بھی کشتی رانی کیلئے بند کردیا گیا ہے۔
تاہم محکمہ موسمیات نے برف باری آئندہ چند روز تک جاری رہنے اور درجۂ حرارت میں مزید کمی ہونے کی پیش گوئی کی گئی ہے جبکہ شہریوں کو غیر ضروری سفر سے اجتناب کرنے کی ہدایات جاری کر دی ہیں۔
