The news is by your side.

Advertisement

بھارتی فوج کی ایل او سی پر بلااشتعال فائرنگ، فوجی جوان شہید

راولپنڈی: بھارتی فوج نے لائن آف کنٹرول (ایل او سی) پر بلا اشتعال فائرنگ کی جس کے نتیجے میں پاک فوج کے حوالدار لیاقت شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق بھارتی فوج کی اشتعال انگیزی کا سلسلہ جاری ہے، بھارتی فوج نے ایل او سی کے بیڈوری سیکٹر پر بلا اشتعال فائرنگ کی جس کے نتیجے میں حوالدار لیاقت شہید ہوگئے۔

آئی ایس پی آر کے مطابق بھارتی فوج نے جان بوجھ کر شہری آبادی کو نشانہ بنایا۔

آئی ایس پی آر کا کہنا ہے کہ پاک فوج نے موثر اور بھرپور جوابی کارروائی کی جس میں بھارتی فوج کو بھاری جانی نقصان ہوا۔ 39 سالہ شہید حوالدار لیاقت کا تعلق ڈسٹرکٹ چکوال سے ہے۔

مزید پڑھیں: پاک فوج کا بھارت کو ایک اور سرپرائز، گیارہواں‌ کواڈ کاپٹر مار گرایا

واضح رہے کہ کچھ دیر قبل لائن آف کنٹرول چکھوٹی سیکٹر پر تعینات جوانوں نے پاکستانی حدود میں داخل ہونے والے بھارت کے جاسوس کواڈ کاپٹر کو مار گرایا۔

آئی ایس پی آر کے مطابق بھارتی کواڈ کاپٹر لائن آف کنٹرول سے پاکستانی علاقے میں 500 میٹر اندر تک داخل ہوچکا تھا جس کو فوری طور پر نشانہ بنا کر گرایا گیا۔

آئی ایس پی آر کے مطابق لائن آف کنٹرول پر اب تک گرائے جانے والے بھارتی ڈرونز (کواڈ کاپٹر) کی تعداد گیارہ تک پہنچ چکی ہے۔

یاد رہے کہ اس سے قبل 26 جولائی کو پاک فوج نے لائن آف کنٹرول کے پانڈو سیکٹر سے پاکستان حدود میں 200 میٹر تک اندر داخل ہونے والے کواڈ کاپٹر کو نشانہ بنایا تھا۔

Comments

یہ بھی پڑھیں