دنیا بھر سمیت پاکستان میں بھی اینڈرائڈ سسٹم والے فونز بے حد مقبول ہو رہے ہیں، اس میں بہت سارے ایسے فیچرز موجود ہیں جن سے ابھی تک ہماری واقفیت نہیں ہوئی ہوگی۔
صارفین اینڈرائڈ فونز کے مختلف ورژنز استعمال کر رہے ہیں، تاہم اسمارٹ فون آپریٹنگ سسٹم کے 8 ایسے دل چسپ فیچرز ہیں جن سے اکثریت ناواقف ہوگی۔
سیاہ بیک گراؤنڈ
اگر آپ اپنے اسکرین کے لیے سیاہ بیک گراؤنڈ منتخب کرتے ہیں تو از خود پکسل ہائی لائٹ کا آپشن بند ہو جائے گا، اور آپ کی بیٹری دیر تک چلے گی (تاہم یہ فیچر تمام اینڈرائڈ فونز میں دستیاب نہیں)۔
کتاب سنیں
ٹیکسٹ ٹو اسپیچ آپشن کے ذریعے آپ اپنے اینڈرائڈ فون پر کوئی بھی مضمون یا کتاب سن سکتے ہیں کیوں کہ یہ آپشن ٹیکسٹ کو آواز میں بدل کر سناتا ہے۔ اس کے لیے پہلے سیٹنگز میں جائیں پھر ایسسیبلٹی آپشن پر جا کر ٹیکسٹ ٹو اسپیچ آپشن آن کر دیں۔
فون گم ہونے پر ڈیٹا کیسے ڈیلیٹ کریں؟
سیٹنگز پر جائیں، وہاں سے سیکیورٹی پر جا کر ڈیوائس منیجر کے آپشن میں سے اینڈرائڈ ڈیوائس منیجر کا انتخاب کریں اور پھر ریموٹلی لوکیٹ دِس ڈیوائس سے allow remote lock and erase کے آپشن پر کلک کر دیں۔ اب اگر آپ کا فون چوری یا گُم ہو جاتا ہے تو آپ ویب سائٹ کے ذریعے اس کا سارا ڈیٹا مٹا سکتے ہیں اور موبائل فون لاک کر سکتے ہیں۔
اگر فون کچھ دیر کے لیے کسی کو دینا چاہتے ہیں؟
اگر آپ اپنے دوست کو وقتی طور پر استعمال کے لیے اپنا اسمارٹ فون دینا چاہتے ہیں تو اس کے لیے مہمان (گیسٹ) موڈ کا بہترین آپشن استعمال کیا جا سکتا ہے۔
فون کو دو انگلیوں سے سوائپ کریں، اور یوزر آئکن کو ٹچ کریں جو اوپر سیدھی جانب موجود ہے، ایک گیسٹ آئکن سامنے آ جائے گا۔ اب یہاں آپ ان سہولیات اور آپشن پر کلک کر سکتے ہیں جنھیں دوسرا استعمال کر سکتا ہے، آپ اپنے ڈیٹا کو بھی چھپا سکتے ہیں۔
نظر کمزور ہے
اسکرین میگنیفائر کے آپشن سے آپ ٹیکسٹ اور دیگر اشیا کو اپنے اسکرین پر بڑا کر کے دیکھ سکتے ہیں۔ اگر کسی کی نظر کمزور ہے تو اینڈرائڈ کا ایک آپشن اس کا مداوا کر سکتا ہے اور آپ فون کے کسی بھی حصے کو میگنیفائی کر سکتے ہیں۔
سیٹنگز کے آپشن پر جائیں پھر وہاں سے ایسیسبلٹی تک اور اس کے بعد میگنیفکیشن کا آپشن استعمال کریں، پھر اسکرین کے کسی بھی حصے کو تھپتھپا کر زوم کر لیں۔
وائی فائی ہاٹ اسپاٹ
آپ کو مختلف ڈیوائسز چلانے کے لیے قیمتی موڈیم اور راؤٹر خریدنے کی ضرورت نہیں، اسمارٹ فون ازخود وائی فائی ہاٹ اسپاٹ بن سکتا ہے۔ سیٹنگز پر جائیں اور ٹیتھرنگ اینڈ پورٹیبل ہاٹ اسپاٹ پر جا کر پورٹیبل WLAN ہاٹ اسپاٹ آپشن پر چیک کر دیں۔
سر کی حرکت سے فون کنٹرول
کیا آپ جانتے ہیں کہ اینڈرائڈ فون کو سر کی حرکت سے بھی کنٹرول کیا جا سکتا ہے، ایک فری ایپ فیشل eva فیشل ماؤس کے ذریعے اینڈرائڈ آلات کو بڑی آسانی سے سروں کی حرکت سے کنٹرول کیا جا سکتا ہے ۔
چھپا گیم
اینڈرائڈ 2.3 جنجر بریڈ میں ایک چھوٹا گیم چھپا ہے لیکن اسے ڈھونڈ نکالنا بہت مشکل ہوتا ہے، سیٹنگز میں جائیں اور اباؤٹ فون اور اباؤٹ ٹیبلٹ کے آپشن میں جائیں۔ اب اینڈرائڈ ورژن پر کئی بار ٹیپ کریں۔ اس کے ساتھ ہی ایک چھوٹی مارش میلو (نرم میٹھی سوغات) سامنے آ جائے گی۔ اس پر ٹیپ کریں اور ایک دل چسپ گیم آپ کے سامنے ہوگا۔
