The news is by your side.

Advertisement

مسلمان اداکار سے محبت، سوناکشی نے تردید کردی

ممبئی: بالی ووڈ اداکارہ سوناکشی سنہا نے اپنی اور اداکار ظہیر اقبال کی محبت سے متعلق جاری خبروں کی تردید کردی۔

بھارتی میڈیا میں گزشتہ ہفتے سے افواہیں زیرگردش تھیں کہ دبنگ گرل سلمان خان کی نئی آنے والی فلم ’نوٹ بک‘ سے ڈیبیو کرنے والے اداکار ظہیر اقبال کی محبت میں گرفتار ہوگئیں اور اُن سے شادی کی خواہش مند ہیں۔

بھارتی میڈیا نے دعویٰ کیا تھا کہ دونوں کی دوستی کروانے میں دبنگ خان نے کردار ادا کیا اور وہ دونوں سلمان خان کی سالگرہ کے بعد سے ایک ساتھ مختلف مقامات پر بھی نظر آئے۔

میڈیا میں زیرگردش افواہوں کی تردید کرتے ہوئے سوناکشی کا کہنا تھا کہ ’ظہیر اقبال اچھا اداکار اور دوست ہے، پروپیگنڈا پھیلانے سے پہلے اگر تصدیق کرلی جائے تو لوگوں کو منفی باتوں پر زیادہ توانائی خرچ کرنے کی ضرورت نہیں پڑے گی‘۔

مزید پڑھیں: سوناکشی سنہا مسلمان لڑکے کی محبت میں گرفتار

سوناکشی کا کہنا تھا کہ ’جس طرح سلمان خان نے مجھے انڈسٹری میں متعارف کرایا اُسی طرح دبنگ خان ظہیر اقبال کو بھی فلمی پردے پر لارہے ہیں، میرا فرض بنتا ہے ایک نئے اداکار کو سپورٹ اور اُس کی حوصلہ افزائی کروں‘۔

اداکارہ کا کہنا تھا کہ ’محبت میں گرفتار ہونا تو دور کی بات میں ظہیر اقبال کے بارے میں زیادہ نہیں جانتی البتہ بطور فلمی شخصیت اُن سے ملاقاتیں ضرور ہوئیں مگر کسی کو انہیں غلط رنگ دینے کی اجازت نہیں ہے‘۔

بھارتی میڈیا میں یہ خبریں بھی زیرگردش تھیں کہ سلمان خان نے دونوں اداکاروں کی دوستی کروائی اور اب سوناکشی نوجوان اداکار کی محبت میں گرفتار ہیں، قیاس آرائیوں کی ایک اہم وجہ یہ بھی تھی کہ نوٹ بک کے ہیرو اکثر سلمان خان کے ساتھ نظر آتے ہیں، اس کے علاوہ دبنگ خان کی سالگرہ میں سوناکشی اور ظہیر اقبال ایک ساتھ نظر آئے تھے۔

یاد رہے کہ ظہیر اقبال نئی آنے والی فلم ’نوٹ بک‘ سے انڈسٹری میں ڈیبیو کرنے جارہے ہیں جبکہ اُن کی سلمان خان سے بہترین دوستی بھی ہوچکی۔

یہ بھی پڑھیں: فلموں میں بوس و کنار کے مناظر کیوں ادا نہیں کرتی، سوناکشی نے بتادیا

نوٹ بک رومانوی فلم ہے جس میں ظہیر اقبال اور منیش بہل کی صاحبزادی پرانوتن مرکزی کردار ادا کریں گے، فلم 29 مارچ کو ریلیز کیے جانے کا امکان ہے۔

دوسری جانب سوناکشی اپنی نئی آنے والی فلم ’ویلکم ٹو نیویارک‘ کی شوٹنگ میں مصروف ہیں جس میں اُن کے ساتھ دلجیت ووسنج، بومن ایرانی، کرن جوہر، رتیش دیش مکھ اور لارا دتہ کردار ادا کرتے نظر آئیں گے۔

چکری تولیتی کی ہدایت کاری میں بنائی جانے والی ’ویلکم ٹو نیویارک‘ 23 فروری کو ریلیز کی جائے گی، فلم میں سلمان خان اداکارہ سوناکشی سنہا کے ساتھ ’نین پھسل گئے‘ گانے میں بھی نظر آئیں گے۔

واضح رہے کہ بالی ووڈ اداکارہ سوناکشی سنہا نے سپر اسٹار سلمان خان کے ساتھ 2010 میں ریلیز ہونے والی بلاک بسٹر فلم’’دبنگ‘‘ سے اپنے کیرئیر کی شروعات کی تھی اور فلم کے سیکوئل ’’ دبنگ 2‘‘ میں بھی اداکارہ نے مرکزی کردار ادا کیا تھا۔

ویڈیو دیکھیں: سلمان خان اور انوشکا کے ’نین پھسل گئے‘

بھارتی میڈیا کے مطابق سوناکشی سنہا کو دبنگ کے تیسرے سیکوئل میں بھی اداکاری کے جوہر دکھانے کی پیش کش کی جاچکی ہے، فلم کے پروڈیوسر ارباز خان کا کہنا تھا کہ دبنگ تھری کا اسکرپٹ تیار ہے اور جلد ہی اس کی شوٹنگ کا آغاز کردیا جائے گا۔

Comments

comments

یہ بھی پڑھیں