ممبئی: بالی ووڈ اداکارہ سونم کپور نے پاکستان آنے اور یہاں موجود مداحوں سے ملاقات کی خواہش کا اظہار کردیا۔
تفصیلات کے مطابق سونم کپور نے سماجی رابطے کی ویب سائٹ انسٹاگرام پر مداحوں کے ساتھ وقت گزارا اور اُن کے مختلف سوالات کے جواب بھی دیے۔مداحوں نے اداکارہ سے نجی زندگی، پسند نا پسند، مصروفیات، شادی اور مستقبل و دیگرسوالات کیے۔
بھارت سے تعلق رکھنے والے ایک صارف نے سونم کپور سے سوال کیا کہ ’آپ مسلمانوں سے محبت کرتی ہیں؟‘ اداکارہ نے جواب دیا کہ ’میں تمام مذاہب اور عقائد سے تعلق رکھنے والے لوگوں سے محبت کرتی ہوں کیونکہ یہ سبق میرے مذہب نے سکھایا ہے‘۔
ایک اور صارف نے اداکارہ سے پوچھا کہ کیا آپ پاکستانی مداحوں کو پسند کرتی ہیں؟ سونم کپور نے جواب دیا کہ ’مجھے پاکستان سے بہت محبت ہے اور پاکستان آنے کا دل بھی چاہتا ہے‘۔
سونم کے مداح نے لوگوں کو ہر وقت مسکرانے اور خوش رکھنے کی وجہ پوچھی تو انہوں نے جواب دیا کہ ’میں سب سے متاثر ہوجاتی ہو کر خوش رہتی ہوں، اگر آپ کا موڈ ٹھیک ہو تو آپ دوسروں کو خوش رکھ سکتے ہیں‘۔
بھارتی میڈیا کے مطابق سونم کپور کی مسلمانوں سے محبت اور پاکستان جانے کی خواہش کے بعد ہندو انتہاء پسند ایک بار پھر اُن کے شدید مخالف ہوگئے، قبل ازیں کشمیری بچی آصفہ کے قتل پر جب اداکارہ نے آواز بلند کی تھی تو شدت پسندوں نے انہیں ہندوؤں سے نفرت کرنے والی شخصیت قرار دیا تھا۔
واضح رہے کہ نامور بالی ووڈ اداکارہ سونم کپور اوربھارتی بزنس مین آنند آہوجا 8 مئی کو شادی کے بندھن میں بندھے تھے، پاکستانی فنکار ماہرہ خان نے جوڑے کو مبارک باد دیتے ہوئے نیک تمناؤں کا اظہار کیا تھا جبکہ دونوں اداکاراؤں نے کانز فیسٹول میں ملاقات بھی کی تھی۔
