بیٹے کا عجیب و غریب نام رکھنے کیلئے باپ نے کسی قسم کی ہچکچاہٹ تک محسوس نہ کی بلکہ اسے اپنے لیے قابل فخر جانتے ہوئے کسی کی ناراضگی یا طنز کو بھی خاطر میں نہیں لایا۔
اپنے پیشے اور کام سے لگن ہونا بہت اچھی بات ہے لیکن انڈونیشیا میں ایک شخص نے دفتر کی محبت میں اپنے بیٹے کا نام ہی ڈیپارٹمنٹ آف اسٹیٹیکل کمیونیکیشن رکھ دیا۔
غیر ملکی خبر رساں ادارے کی رپورٹ کے مطابق 38 سالہ یوگا یاہودی نامی شخص انڈونیشیا کے صوبے سینٹرل جاوا سے تعلق رکھتا ہے۔ رپورٹ کے مطابق یوگا نے اپنی بیوی کو کہا تھا کہ اگر اس بیٹا پیدا ہوا تو وہ اس کا نام خود رکھے گا۔
گزشتہ سال دسمبر میں جب یوگا کے ہاں بیٹے کی ولادت ہوئی تو اس نے اپنے دفتر کو خراج تحسین پیش کرتے ہوئے اس کے نام پر اپنے بیٹے نام رکھ ڈالا۔
رپورٹ کے مطابق بچے کی ماں نام رکھنے کے اس فیصلے میں والد کے ساتھ تھی۔ یوگا نے بتایا کہ اس کے والدین اور دوست احباب نے عجیب و غریب نام رکھنے پر کافی ناراضگی کا اظہار کیا ہے۔
رپورٹ کے مطابق یوگا نے بچے کے لمبے نام کے پیش نظر اس کو ڈنکو کہہ کر پکارنا شروع کر دیا ہے۔
