عراق سے کویت ممنوعہ اشیاء کی اسمگلنگ کی کوشش کو ناکام بنادیا گیا، عراق سے کویت آنے والے افراد کے سامان سے جادو ٹونہ کرنے والی ممنوعہ اشیاء کو ضبط کرلیا گیا ہے۔
بین الاقوامی خبر رساں ادارے کی رپورٹ کے مطابق کسٹمز افسران نے کویت ابدلی سرحدی بندرگاہ پر ملک میں جادو اور ٹونے سے متعلق مواد اسمگل کرنے کی متعدد کوششوں کو ملیا میٹ کیا ہے، کئی مسافروں نے عراق سے واپسی پر یہ ممنوعہ اشیاء اپنے ساتھ لانے کی کوشش کی۔
کسٹم ذرائع کے مطابق ہمارے افسران نے عراق سے آنے والے افراد کی سرچنگ کے دوران جادو ٹونے میں استعمال ہونے والی اشیاء کو اسمگل کرنے کی کوششوں کو ناکام بنادیا ہے۔ یہ غیر قانونی اشیاء مسافروں کے کپڑوں یا سامان میں چھپائی گئی تھیں۔
ذرائع کا کہنا ہے کہ جادو اور ٹونے کے اوزار رکھنے کے جرم میں پکڑے گئے افراد کو وارننگ جاری کی گئی تھی کہ وہ دوبارہ ملک میں ایسے ممنوعہ مواد لانے کی کوشش نہ کریں۔
واضح رہے کہ کچھ دن قبل بھی کویت میں ایک غیر ملکی شہری جس کا تعلق ایک افریقی ملک سے بتایا گیا ہے کو جادو ٹونہ کرنے کے جرم میں حراست میں لے لیا گیا تھا۔
