بھارتی کرکٹ کے بورڈ کے سربراہ سارو گنگولی نے ویرات کوہلی کو ون ڈے کی کپتانی سے ہٹانے کی وجہ بتادی۔
بھارتی میڈیا کی رپورٹس کے مطابق بھارتی کرکٹ بورڈ کے سربراہ سارو گنگولی نے انکشاف کیا کہ کرکٹ بورڈ نے ویرات کوہلی سے درخواست کی تھی کہ وہ ٹی 20 کی کپتانی نہ چھوڑیں لیکن پھر بھی وہ ٹی 20 کی قیادت سے دستبردار ہوگئے۔
گنگولی کا کہنا تھا کہ ویرات کوہلی نے بی سی سی آئی کی درخواست کی پرواہ نہیں کی ان کو ون ڈے ٹیم کی قیادت سے ہٹانا مجبوری تھا۔
سارو گنگولی نے کہا کہ بھارت دو وائٹ بال کے کپتان نہیں رکھ سکتا تھا، روہت شرما کو اسی لیے ٹی 20 کے ساتھ ایک روزہ فارمیٹ کی کپتانی بھی دی گئی۔
مزید پڑھیں: بھارت کی ون ڈے ٹیم کے نئے کپتان کا اعلان
واضح رہے کہ گزشتہ روز بھارتی کرکٹ بورڈ کی جانب سے روہت شرما کو ٹی 20 کے بعد ون ڈے ٹیم کا کپتان مقرر کیا گیا۔
بی سی سی آئی کا کہنا تھا کہ جنوبی افریقا کےخلاف ٹیسٹ سیریز میں ویرات کوہلی بھارتی ٹیم کی قیادت کریں گے جبکہ روہت شرما نائب کپتان ہوں گے۔
یاد رہے کہ ویرات کوہلی ٹی ٹوئنٹی ورلڈکپ کے بعد بھارتی ٹیم کی ٹی ٹوئنٹی فارمیٹ میں کپتانی سے دستبردار ہوگئے تھے لیکن انہوں نے ون ڈے میں کپتانی نہیں چھوڑی تھی۔
