لندن: ساؤتھ پورٹ واقعے کے بعد برطانیہ میں مظاہروں میں شدت آ گئی ہے، برطانوی حکومت اور پرتشدد احتجاج کرنے والے مظاہرین میں ٹھن گئی ہے۔
برطانوی میڈیا رپورٹس کے مطابق برطانیہ میں پُرتشدد احتجاج اب دیگر شہروں میں بھی پھیلنے لگا ہے، مظاہرین نے بیلفاسٹ کی سڑکوں پر آگ لگا دی، اور ساؤتھ پورٹ سے شروع ہونے والے ہنگامے پلائی ماؤتھ تک پھیل گئے۔
مختلف مقامات پر پولیس اور مظاہرین میں جھڑپیں ہو رہی ہیں، مظاہرین نے پولیس پر اینٹیں پھینکیں، جس سے متعدد پولیس اہلکار زخمی ہو گئے۔
دوسری طرف ہنگامہ آرائی روکنے کی حکومتی کوششوں کو مربوط کرنے کے لیے ’کوبرا میٹینگ‘ کا انعقاد کیا گیا، جس میں انٹیلیجنس کا جائزہ لیا گیا، اور افسران کی تعیناتی پر تبادلہ خیال ہوا۔
اجلاس میں 600 مقامات کو جیلوں کے لیے مختص کیا گیا، برطانوی وزیر اعظم سر کیئر اسٹارمر نے کہا کہ 400 سے زائد افراد کو گرفتار کر لیا گیا ہے، اور 100 پر فردِ جرم عائد کر دی گئی۔
برطانیہ: فسادیوں کو قابو کرنے کے لیے جیلوں میں 500 سے زائد نئے سیلز کی تیاری
ان کا کہنا تھا کہ نسلی فسادات میں ملوث افراد کو ایک ہفتے میں سزائیں سنا کر جیل بھیجیں گے، اور لوگوں کو محفوظ رکھنے کے لیے ہر ممکن حد تک جائیں گے۔ دوسری طرف برطانوی وزیر داخلہ نے مساجد کی حفاظت کے لیے اضافی نفری تعینات کرنے کا حکم دے دیا ہے، کیوں کہ پر تشدد احتجاج اب تارکین وطن کے خلاف مہم میں بدلتے جا رہا ہے اور مظاہرین تارکین وطن کو واپس بھیجنے کا مطالبہ کر رہے ہیں۔
