میڈرڈ (18 جون 2026): اسپین کی حکومت نے لاکھوں غیر قانونی تارکین وطن کے لیے نئی پالیسی کی منظوری دے دی ہے۔
اسپین کی حکومت نے ایک پالیسی منظور کی ہے جس کے تحت ملک میں موجود تقریباً پانچ لاکھ غیر قانونی تارکینِ وطن کو قانونی حیثیت دینے کا منصوبہ بنایا گیا ہے۔
اس منصوبے کے تحت اہل افراد کو ایک سال کا قابلِ تجدید رہائشی اجازت نامہ دیا جائے گا، جس کے ذریعے وہ اپنی قانونی حیثیت درست کر سکیں گے اور مرحلہ وار اسپین کے باقاعدہ روزگار اور انتظامی نظام کا حصہ بن سکیں گے۔
تاہم اس پروگرام سے فائدہ اٹھانے کے لیے درخواست گزاروں کو یہ ثابت کرنا ہوگا کہ وہ یکم جنوری سے پہلے اسپین پہنچ چکے تھے اور درخواست دینے سے پہلے کم از کم پانچ ماہ سے وہاں مقیم ہیں۔
اس کے علاوہ انہیں یہ بھی ثابت کرنا ہوگا کہ ان کا مجرمانہ ریکارڈ صاف ہے۔
درخواست کیسے جمع کرائیں؟
درخواست جمع کرانے کی آخری تاریخ 30 جون مقرر کی گئی ہے۔ تاہم ابتدائی طور پر درخواستیں آن لائن 16 اپریل سے جمع کرائی جا سکتی ہیں، جبکہ 20 اپریل سے درخواستیں ذاتی طور پر بھی جمع کروانے کی سہولت فراہم کی جائے گی۔
جن افراد کو یہ عارضی قانونی حیثیت مل جائے گی، وہ ایک سال مکمل ہونے کے بعد اسپین کے موجودہ امیگریشن نظام کے تحت دیگر اقسام کے ورک پرمٹ یا رہائشی اجازت ناموں کے لیے درخواست دے سکیں گے۔
اگر کسی درخواست گزار کے ساتھ اس کے قریبی خاندان کے افراد، جیسے شریکِ حیات، رجسٹرڈ پارٹنر یا قریبی رشتہ دار ایک ہی گھر میں رہتے ہوں تو ان کی درخواستوں پر بھی بیک وقت کارروائی کی جائے گی تاکہ خاندان کو الگ نہ کیا جائے۔
درخواست گزاروں کو ایک ماہ میں اپنے آبائی ملک سے مجرمانہ ریکارڈ نہ ہونے کا سرٹیفکیٹ حاصل کر کے جمع کرانا ہوگا۔
درخواست جمع کروانے میں سہولت کے لیے حکومت نے ملک بھر میں مختلف مراکز مقرر کیے ہیں جہاں ذاتی طور پر درخواستیں جمع کرائی جا سکتی ہیں، جن میں 60 سوشل سکیورٹی دفاتر، 371 ڈاک خانے اور پانچ امیگریشن دفاتر شامل ہیں۔
اس سے پہلے اسپین میں بڑے پیمانے پر قانونی حیثیت دینے کا پروگرام 2005 میں شروع کیا گیا تھا، جب تقریباً پانچ لاکھ ستتر ہزار تارکینِ وطن کو قانونی رہائش دی گئی تھی۔
