خصوصی افراد کا عالمی دن، پاک فضائیہ کے زیر اہتمام پروقار تقریب، ایئرچیف مراشل کی شرکت
The news is by your side.

Advertisement

خصوصی افراد کا عالمی دن، پاک فضائیہ کے زیر اہتمام پروقار تقریب

اسلام آباد: پاک فضائیہ کے زیر اہتمام خصوصی افراد کے عالمی دن پر خصوصی تقریب کا انعقاد کیا گیا، سربراہ ایئر چیف مارشل مجاہد انور خان نے شرکت کی۔

تفصیلات کے مطابق پوری دنیا میں آج خصوصی افراد کا عالمی دن منایا گیا، اسی موقع کی مناسبت سے پاک فضائیہ نے نورخان آڈیٹوریم، ائیر ہیڈ کوارٹرز اسلام آباد میں ایک پر وقار تقریب کا انعقاد کیا۔

پاک فضائیہ کے سربراہ ائیر چیف مارشل مجاہد انور خان اس تقریب کے مہمان خصوصی تھے۔

ائیر وائس مارشل عامر مسعود، ڈپٹی چیف آف دی ائیر سٹاف (سپورٹ) نے خطبہ استقبالیہ میں معاشرے کو خصوصی افراد کے لیے سازگار بنانے کیلئے اپنی ذمہ داریوں پر روشنی ڈالی۔

خصوصی بچوں کے والدین سے گفتگو کرتے ہوئے ائیر چیف نے پاک فضائیہ کو خصوصی افراد کے لیے ایک مشفق ادارہ بنانے کے عزم کا اعادہ کیا۔

ان کا کہنا تھا کہ ہم سب یہاں خصوصی افراد کے بارے میں آگاہی کے لیے اکٹھے ہوئے ہیں اور پاک فضائیہ ان افراد کو معاشرے کا کارآمد فرد بنانے کے لیے اپنی کاوشیں جاری رکھے گی۔

تقریب میں پی اے ایف اسپیشل اسکول اسلام آباد کے بچوں نے قومی ترانہ پڑھا اور اسٹیج پر مختلف خاکے پیش کیے۔ پی اے ایف اسپتال کے سینئر سائیکاٹرسٹ ونگ کمانڈر نجم نے اسپیشل بچوں کے ساتھ برتاؤ کے بارے میں گفتگو کی۔ اس دوران شرکاء کے ساتھ تبادلہ خیال میں ان بچوں کے والدین نے اپنے تجربات پررو شنی ڈالی۔

خیال رہے کہ 1992ء سے اقوام متحدہ 3 دسمبر کو سالانہ خصوصی افراد کے عالمی دن کے طور پر مناتی ہے۔ اس سال اس دن کا موضوع ’’ خصوصی افراد کو مکمل اختیارات دینا اور انہیں برابری کے مواقع فراہم کرنے کو یقینی بنانا‘‘ ہے۔

واضح رہے کہ پاک فضائیہ نے ان بچوں کو برابری کے موقع فراہم کرنے کے لیے پاکستان کے مختلف شہروں میں تیرہ اسپیشل اسکول قائم کئے ہیں جہاں نہ صرف ان بچوں کو جدید سمعی وبصری آلات کے ذریعے تعلیم دی جاتی ہے بلکہ ان کے والدین کو بھی بہترین رہنمائی فراہم کی جاتی ہے۔

Comments

comments

یہ بھی پڑھیں