ریاض: سعودی عرب میں 4 بھائیوں نے فراغت کا حل نکالتے ہوئے گھر کی چھت پر اسپورٹس کلب بنا دیا، سوشل میڈیا پر ان کے کلب کو بے حد پسند کیا جارہا ہے۔
مکہ مکرمہ کے رہائشی محمد داغستانی نے وائرل ویڈیو میں اسپورٹس کلب کے بارے میں بتایا کہ ہم 4 بھائی ہیں اور ہمارے ساتھ ہمارا بھتیجا بسام بھی شریک ہوگیا ہے۔
داغستانی نے بتایا کہ کرفیو شروع ہوا تو چاروں بھائی اپنی والدہ کے فلیٹ میں جمع ہوجاتے کیونکہ اس کے سوا ہمارے پاس کوئی اور سرگرمی نہیں تھی۔ اسی دوران گھر کی چھت پر اسپورٹس کلب بنانے کا خیال ذہن میں آیا، ایک ہفتے کے اندر اس کی تیاری کرلی گئی اور سائنٹفک بنیادوں پر اسپورٹس کلب ڈیزائن کیا گیا۔
انہوں نے کہا کہ وہ اور ان کے بھائی گھر کی چھت پر ایکسر سائز کر رہے ہیں، یہ ایکسر سائز افطار سے قبل یا تراویح کے بعد کرتے ہیں۔ سب سے چھوٹا بھائی یاسر ہمارا ٹرینر بنا ہوا ہے۔
داغستانی نے بتایا کہ سوشل میڈیا پر کئی لوگوں نے ہمارے اسپورٹس کلب پر شکوک و شبہات کا اظہار بھی کیا، کئی لوگ سمجھ رہے ہیں کہ ہم نے اجتماع کا جواز پیدا کرنے کے لیے اسے تشکیل دیا ہے۔
ویڈیو میں انہوں نے بتایا کہ میں اپنے ان بھائیوں کو بتانا چاہتا ہوں کہ جس عمارت کی چھت پر اسپورٹس کلب بنایا گیا ہے وہ ہمارے خاندان کی چھت ہے، اس میں کرائے کا کوئی مکان نہیں ہے۔ ہم چاروں بھائی اور ان کی اولادیں اس عمارت میں رہتی ہیں۔
داغستانی نے سوشل میڈیا کے ان صارفین کا شکریہ بھی ادا کیا جنہو ں نے اسپورٹس کلب کے قیام پر پسندیدگی کا اظہار کیا۔
