کولمبو: سری لنکن کرکٹر کوشل مینڈس کو پولیس نے 64 سالہ شخص کو ہلاک کرنے کے الزام میں گرفتار کر لیا۔
تفصیلات کے مطابق سری لنکن وکٹ کیپر بلے باز کوشل مینڈس کی کار کی ٹکر سے سائیکل سوار 64 سالہ شخص جان کی بازی ہار گئے، پولیس نے سری لنکن ٹیم کے کھلاڑی کو گرفتار کر کے مقدمہ درج کر لیا۔
پولیس کے مطابق حادثہ کولمبو کے جنوب میں واقع پنادوار میں صبح 5 بجے ہوا۔پولیس حکام کا کہنا ہے کہ حادثے کے وقت کوشل مینڈس خود کار چلا رہے تھے۔
سری لنکن بلے باز کو آئندہ 48 گھنٹوں میں پنادوار مجسٹریٹ کے سامنے پیش کیے جانے کا امکان ہے جبکہ پولیس نے واقعے کی تحقیقات کا آغاز کر دیا ہے۔
خیال رہے کہ وکٹ کیپر بیٹسمین کوشل مینڈس 44 ٹیسٹ اور 76 ون ڈے میچوں میں سری لنکا کی نمائندگی کا اعزاز رکھتے ہیں اور مجموعی طور پر 5 ہزار سے زائد رنز بنا چکے ہیں، اس کے علاوہ وہ 26 ٹی 20 میچوں میں بھی سری لنکا کی نمائندگی کر چکے ہیں۔
