کولمبو: بدترین معاشی بحران کا شکار سری لنکا نے بھارت سے مزید 80 کروڑ ڈالر کی درخواست کی ہے اور بھارت نے اس درخواست پر غور کرنے کا عندیہ دیا ہے۔
بین الاقوامی میڈیا کے مطابق سری لنکا کے صدر گوٹابایا راج پاکسے کے دفتر سے جاری بیان میں کہا گیا ہے کہ بھارتی حکومت ایک قریبی دوست کی حیثیت سے موجودہ مشکل صورتحال پر قابو پانے میں سری لنکا کو مکمل تعاون فراہم کرے گی۔
یک روز قبل ہی بھارتی وفد نے سری لنکا کے صدر سے معاشی بحران پر تبادلہ خیال کیا تھا۔
سری لنکا پہلے ہی بھارت سے خاصی امداد لے چکا ہے اور اس نے مزید مدد طلب کی ہے، بھارت کا ردعمل زیادہ پرجوش نہیں تھا، لیکن اس نے مناسب غور کرنے کی بات ضرور کی ہے۔
خارجہ سیکریٹری ونے کواترا کی قیادت میں ایک اعلیٰ سطح کے بھارتی وفد نے جمعرات کو صدر گوٹابایا راج پکسے، وزیر اعظم رانیل وکرما سنگھے اور خارجہ سیکریٹری ارونی وجے وردھنے سے ملاقات کی تھی۔
وکرما سنگھے نے پارلیمنٹ کو بتایا کہ بھارت کی حالیہ امداد 4 ارب ڈالر تھی لیکن بھارتی ہائی کمیشن نے اسے 3.5 بلین ڈالر سے زیادہ بتایا۔
سری لنکا بھارت سے تقریباً 80 کروڑ ڈالر (ایندھن کے لیے 50 کروڑ اور دیگر ضروری اشیا کے لیے کروڑ 30 ڈالر) کا مطالبہ کر رہا ہے، سری لنکا کو انڈین کریڈٹ لائن سہولت کے تحت ضروری غذائی اشیا، ایندھن، ادویات اور کھاد حاصل ہوئی ہیں۔
بھارتی وفد کا کہنا ہے کہ نئی دہلی سری لنکا کو مسلسل مدد فراہم کرنے کے لیے پرعزم ہے، فریقین نے سری لنکا کی معیشت کو مستحکم اور بحال کرنے کے لیے ہندوستانی امدادی پروگرام کے مستقبل کے لائحہ عمل پر تفصیل سے تبادلہ خیال کیا۔
وفد نے اس یقین کا اظہار کیا کہ ملک جلد ہی موجودہ چیلنجز پر قابو پا لے گا۔
