The news is by your side.

Advertisement

سری لنکا کی آئی ڈونیشن سوسائٹی پاکستان کو ہر سال آنکھوں کے 200قرنیے عطیہ کرے گی

کراچی : بینائی سے محروم افراد کے لیے خوشخبری، سری لنکا کی آئی ڈونیشن سوسائٹی پاکستان کو ہر سال آنکھوں کے 200قرنیے عطیہ کرے گی، جو ضرورت مند مریضوں کو مفت لگائے جائیں گے، یہ آپریشنز ہاشمانیز میڈیکل ویلفیئرفاوٴنڈیشن کے اسپتالوں میں کیے جائیں گے۔

تفصیلات کے مطابق ہاشمانیز میڈیکل اینڈ ویلفیئر فاوٴنڈیشن نے ورلڈ میمن آرگنائزیشن کی مدد سے سری لنکا آئی ڈونیشن سوسائٹی کے ساتھ ایک معاہدہ کیا ہے، جس کے تحت سوسائٹی ہر سال آنکھوں کے 200 قرنیے ہر سال عطیہ کرے گی، جو فاوٴنڈیشن کے تحت ملک بھر میں ضرورت مند مریضوں کو مفت لگائے جائیں گے۔

اس آپریشن کے عام طور پر اخراجات دو لاکھ روپے ہوتے ہیں تاہم ضرورت مندوں کویہ سہولت مفت فراہم کی جائے گی، جس سے انہیں مکمل زندگی گزارنے کا ایک نیا موقع ملے گا۔

اس بات کا اعلان چیئرمین ہاشمانیز میڈیکل اینڈ ویلفیئر فاوٴنڈیشن مایہ ناز آئی سرجن ڈاکٹر شریف ہاشمانی نے جمعہ کو ہاشمانیز اسپتال میں پریس کانفرنس کے دوران کیا، اس موقع پر سی ای او ہاشمانیز گروپ آف ہاسپیٹلز ارسلان ہاشمانی بھی ان کے ہمراہ موجود تھے۔

ڈاکٹر شریف ہاشمانی نے بتایا کہ اب تک وہ قرنیے کی تبدیلی کے چھ آپریشن کامیابی سے کر چکے ہیں اور جلد مزید بھی کیے جائیں گے۔ ایسے مریضوں کے اخراجات مکمل طور پر فاو نڈیشن کی جانب سے برداشت کیے جاتے ہیں۔

،انہوں نے بتایا کہ ہاشمانیز میڈیکل اینڈ ویلفیئر فاوٴنڈیشن 1979 سے آنکھوں کی دیکھ بھال اور عام علاج کی اعلیٰ معیار کی سہولیات فراہم کر رہی ہے
فاؤنڈیشن کے تحت ملک بھر میں آنکھوں اور جنرل مفت کیمپ ہزاروں کی تعداد میں لگائے جاتے ہیں، اب تک ایک لاکھ سے زائد آپریشنز کیے جا چکے ہیں، چھ لاکھ سے زائد نظر کے چشمے تقسیم کیے گئے ہیں، سات لاکھ سے زائد مریضوں کی تشخیص اور علاج مفت کیا جا چکا ہے۔

ہاشمانیز میڈیکل اینڈ ویلفیئر فاو نڈیشن پہلی سماجی تنظیم ہے، جس نے 1995 میں آئی کیمپوں کے ذریعے فیکو متعارف کرایا اور او آئی ایل ایس امپلانٹس بھی کیے، اس کے علاوہ ہاشمانیز پہلا اور اس وقت واحد آنکھوں کا اسپتال ہے جہاں لاسک سرجری مفت کی جاتی ہے۔

ڈاکٹر شریف ہاشمانی نے بتایا کہ فاوٴنڈیشن کے تحت کراچی میں پانچ اسپتال صدر، کلفٹن، گلستان جوہر، نارتھ کراچی اور رنچھوڑ لائن میں خدمات انجام دے رہے ہیں، اوشین مال میں ایک پرائمری ہیلتھ سینٹر کام کر رہا ہے۔ اس کے علاوہ لیکسن میڈیکل ٹرسٹ کے تعاون سے صوابی، خیبرپختونخواہ اور ساہیوال، پنجاب میں مزید دو اسپتال بھی قائم کر دئیے گئے ہیں۔

انھوں نے کہا کہ اس وقت فاو نڈیشن کے تحت ہر سال چھ ہزار آپریشنز کیے جاتے ہیں۔ اس کے علاوہ ہر ماہ سینکڑوں مریضوں کا مفت معائنہ کر کے ہاشمانیز کے صدر میں واقع اسپتال میں آپریشنز کرائے جاتے ہیں جہاں بستروں کی گنجائش 75 ہے۔

مستقبل کے منصوبوں کے بارے میں اظہار خیال کرتے ہوئے ڈاکٹر شریف ہاشمانی نے بتایا کہ اسپتال میں مزید نئے شعبے اور ادارے قائم کیے جائیں گے، فاو نڈیشن کی جانب سے ٹھٹھہ میں جلد اسپتال قائم کیا جارہا ہے جبکہ رنچھوڑ لائن، گلستان جوہر اور نارتھ کراچی والے اسپتالوں کی تزئین وآرائش کا کام بھی شروع کرایا جائے گا۔

انہوں نے بتایا کہ فاوٴنڈیشن کا زیادہ تر انحصار زکوٰة اور عطیات پر ہوتا ہے، صرف آئی او ایل کے ایک آپریشن پر 10 ہزار روپے خرچ ہوتے ہیں جبکہ ہم ہر ماہ 40لاکھ روپے اس پر خرچ ہوتے ہیں، اس طرح وی آر سرجری کا خرچہ 50ہزار ہوتا ہے، یہ بھی ہم ہر مہینے 60کیسز کر رہے ہیں جس پر 30لاکھ روپے خرچ ہورہے ہیں۔

ڈاکٹر شریف ہاشمانی نے کہا کہ اس وقت فاوٴنڈیشن کو مالی تعاون اور عطیات کی شدید ضرورت ہے جس سے مزید جدید مشینری خریدی جائے گی۔


خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پرشیئر کریں۔

Comments

comments

یہ بھی پڑھیں