جیکب آباد: پولیس نیب کی جانب سے نامزد بااثر ملزمان کے سامنے بے بس ہوگئی ہے۔
تفصیلات کے مطابق ایس ایس پی جیکب آباد نیب کےمفرور ملزم کے قدموں میں بیٹھ گیا، اے آر وائی نیوز نےافسر کی قدموں میں بیٹھنےکی تصویر حاصل کرلی ہے، ایس ایس پی شمائل ریاض مشیر جیل خانہ جات کے قدموں میں بھی نظر آئے۔
نیب ذرائع کا کہنا ہے کہ ایس ایس پی جیکب آباد نیب کےمفرور ملزم کا آلہ کار بناہوا ہے، ایس ایس پی ملزم کے قدموں میں بیٹھ کر قانون کی بالا دستی کیسےکرسکتےہیں؟۔
نیب نے ایس ایس پی جیکب آباد کو ملزم کا سہولت کار قرار دیا ہے اور ایس ایس پی جیکب آباد شمائل ریاض کو فوری ہٹانےکا مطالبہ کیا ہے۔
نیب ذرائع کا کہنا ہے کہ چیئرمین نیب اسٹیبلشمنٹ ڈویژن سےایس ایس پی کیخلاف رجوع کرینگے
یہ بھی پڑھیں: سکھر نیب ٹیم حملہ: مقدمے کے اندراج پر پولیس اور نیب آمنے سامنے
دوسری جانب سابق صوبائی وزیر اعجاز جاکھرانی کے خلاف مقدمہ کے اندراج کے لئے نیب اور مقامی پولیس میں سخت تناؤ پیدا ہوگیا ہے۔
نیب کی جانب سے دو روز سے مقدمہ درج کرانے کی کوشش جاری تھی مگر جیکب آباد سول لائن پولیس نے نیب کی درخواست کو رد کرتے ہوئے سرکار کی مدعیت میں مقدمے کا اندراج کیا، سرکاری مدعیت میں دائر مقدمے میں تین نامزد اور ڈھائی سو نامعلوم افراد کےخلاف پرچہ کاٹا گیاہے، نیب نے مقدمہ درج کرانے کے لیے احتساب عدالت سے رجوع کرنے کا فیصلہ کیا ہے
