جھاڑکھنڈ : متنازع قانون کیخلاف ڈرامہ کرنے والی اسکول ہیڈ مسٹریس اور اداکار بچے کی والدہ کو گرفتار کرلیا گیا، دونوں خواتین مسلمان ہیں، جن کے خلاف بغاوت کے الزام میں مقدمہ درج کیا گیا ہے۔
تفصیلات کے مطابق بھارت میں شہریت کے متنازع قانون کیخلاف احتجاج کا سلسلہ ملک بھر میں جاری ہے، احتجاجی مظاہروں نے مودی سرکار کو بوکھلاہٹ کا شکار کردیا، اس حوالے سے جھاڑکھنڈ کے ایک اسکول میں اسٹیج ڈرامہ کا انعقاد کیا گیا۔
متنازع قانون کیخلاف ڈرامہ اسٹیج کرنے پر پولیس نے اسکول کی ہیڈ مسٹریس اور ڈرامہ میں کردارادا کرنے والے بچے کی والدہ کو گرفتار کرلیا۔ دونوں خواتین کو بغاوت کے الزام میں گرفتار کیا گیا۔
اسکول ہیڈ مسٹریس اور بچے کی والدہ دونوں مسلمان ہیں، مقامی انتظامیہ کا کہنا ہے کہ اسکول ڈرامے میں وزیراعظم نریندر مودی کو منفی اندازمیں پیش کیا گیا۔
واضح رہے کہ بھارت میں مودی سرکار کے تحت منظور کیے گئے متنازع شہریت بل کے خلاف بھارت کی کئی ریاستوں میں مظاہروں کا سلسلہ جاری ہے، تاہم مغربی بنگال کی اسمبلی میں مسلم مخالف قانون کے خلاف قرارداد کی منظوری کے بعد احتجاج میں تیزی آ گئی ہے۔
گزشتہ روز ضلع مرشد آباد میں نامعلوم مسلح افراد نے مظاہرین پر اندھا دھند فائرنگ کردی، جس کے نتیجے میں 2 افراد ہلاک اور 3 زخمی ہوگئے۔