واشنگٹن: امریکا نے سری لنکا میں مزید ممکنہ دہشت گردوں حملوں سے خبردار کردیا، امریکی محکمہ خارجہ کے ترجمان کا کہنا ہے کہ دہشت گرد عناصر بنا کسی پیشگی انتباہ کے حملے کرسکتے ہیں۔
غیرملکی خبررساں ادارے کے مطابق امریکی وزارت خارجہ نے سری لنکا کا سفر کرنے سے خبردار کرتے ہوئے کہا ہے کہ دہشت گرد جماعتیں سری لنکا میں ممکنہ حملوں کے لیے منصوبہ بندی کررہی ہیں۔
امریکی محکمہ خارجہ کے بیان کے مطابق دہشت گردوں کے ممکنہ اہداف میں سیاحتی مقامات، ٹرانسپورٹ اسٹیشنز، تجارتی مراکز، ہوٹلز، عبادت گاہیں، ہوائی اڈے اور دیگر مقامات شامل ہیں۔
یہ انتباہ گزشتہ روز سری لنکا میں مختلف مقامات پر گرجا گھروں اور بڑے ہوٹلوں کو دھماکوں کا نشانہ بنانے کی کارروائیوں کے بعد سامنے آیا۔
مزید پڑھیں: سری لنکا دھماکے، 290 افراد ہلاک، 500 سے زائد زخمی، ملک میں کرفیو نافذ
واضح رہے کہ سری لنکا میں ہونے والے خودکش حملوں میں 290 افراد ہلاک اور 500 کے قریب زخمی ہوگئے۔
دوسری جانب سری لنکا پولیس نے میں بتایا ہے کہ دارالحکومت کولمبو کے ہوائی اڈے کے نزدیک رات گئے ملنے والے ایک دستی بم کو ناکارہ بنادیا گیا ہے۔
علاوہ ازیں پولیس نے گزشتہ روز ہونے والے دھماکوں میں ملوث ہونے کی بنیاد پر 13 افراد کو حراست میں لیا ہے۔
گرفتار افراد کو کولمبو اور اس کے قریب دو مختلف مقامات پر زیر حراست رکھا گیا ہے، یہ تمام افراد ایک ہی جماعت سے تعلق رکھتے ہیں تاہم جماعت کا نام نہیں بتایا گیا ہے۔
