The news is by your side.

Advertisement

دیا جلا کر سو گئے تھے، حیدر آباد میں جلنے والی ریشم کا دم توڑنے سے قبل بیان

حیدرآباد: گزشتہ روز حیدر آباد میں پیش آنے والے افسوس ناک واقعے کی متاثرہ لڑکی کا موت سے قبل بیان سامنے آ گیا ہے۔

اے آر وائی نیوز کے مطابق گزشتہ روز حیدر آباد کے علاقے سائٹ ایریا لیبر اسکوائر میں ایک گھر میں آگ لگنے سے 5 خواتین جاں بحق ہو گئی تھیں، واقعے کی ایک متاثرہ لڑکی ریشم نے موت سے قبل بیان میں کہا کہ ہم لوگ گھر میں دیا جلا کر سو گئے تھے۔

برنس وارڈ میں زیر علاج ریشم نے دم توڑنے سے قبل بیان دیا کہ ہمیں کسی نے آگ نہیں لگائی، رات کو ہم لوگ گھر میں دیا جلا کر سو گئے تھے۔

علاقے کے ایس ایچ او مظہر سومرو نے میڈیا کو بتایا کہ پولیس نے متاثرہ لڑکی کے دم توڑنے سے پہلے آخری بیان لیا تھا، فلیٹ میں بجلی اور گیس دونوں کنکشن نہیں تھے، ہمیں شبہ تھا کہ آگ ریشم کے ناراض شوہر ارشد نے لگائی ہے، تاہم جب ریشم سے پوچھا گیا کہ کیا تمھارے شوہر نے آگ لگائی ہے؟ تو اس نے منع کیا کہ شوہر نے کچھ نہیں کیا۔

پولیس کا کہنا ہے کہ اس واقعے کی رپورٹ ریشم کے شوہر ارشد کی مدعیت میں درج کی جائے گی۔

یہ افسوس ناک واقعہ 8 اور 9 مارچ کی درمیان رات کو پیش آیا تھا، سائٹ ایریا گنجو ٹکر کی پہاڑی کے قریب فلیٹ میں اس وقت آگ لگی جب سب مکین سو رہے تھے، فلیٹ میں موجود 4 خواتین جھلس کر موقع ہی پر جاں بحق ہو گئی تھیں جب کہ ریشم نامی لڑکی کو شدید زخمی حالت میں سول اسپتال کے برن وارڈ منتقل کر دیا گیا تھا، جس نے گزشتہ روز زخموں کی تاب نہ لا کر دم توڑا۔

fb-share-icon0
Tweet 20

Comments

comments

یہ بھی پڑھیں