کراچی: اسٹیل کی قیمت ریکارڈ بلند ترین سطح پر پہنچ گئی ہے۔

تفصیلات کے مطابق صدر آئرن اسٹیل مرچنٹس ایسوسی ایشن حماد پونا والا نے کہا ہے کہ سریا 280 روپے سے بھی تجاوز کر گیا ہے، جب کہ ایچ آر سی، سی آر سی اور جی پی کی قیمتیں 300 روپے سے بھی تجاوز کر گئیں۔

حماد پونا والا نے کہا کہ سریا مہنگا ہونے کی وجہ حکومت کی ناقص پالیسیاں، بینکوں کی جانب سے ایل سی نہ کھلنا، امپورٹ کے دستاویزات کلیئر نہ ہونا اور ڈالر کی قیمت میں اضافہ ہے۔

انھوں نے کہا لوکل پیداوار نہ ہونے اور اسٹیل ملز کی بندش کے باعث لوہے کا کاروبار مکمل طور پر امپورٹ پر انحصار کر رہا ہے، جب کہ لوہے کی امپورٹ نہ ہونے کہ وجہ سے تعمیراتی انڈسٹری مکمل خسارے میں آ چکی ہے۔

حماد پونا والا نے خدشہ ظاہر کیا کہ تعمیراتی انڈسٹری مکمل بند ہو جائے گی، کیوں کہ تمام انڈسٹری کو اپنی پروڈکشن کے لیے لوہا درکار ہے۔

انھوں نے مطالبہ کیا کہ لوہے کی دیگر اشیا کی قیمتوں میں بے انتہا اضافہ ہو رہا ہے، ایل سیز فوری کھولی جائے۔