راولپنڈی: آسٹریلوی کرکٹ ٹیم کے مایہ ناز بلے باز اسٹیو اسمتھ کا کہنا ہے کہ ان کی پاکستان میں کھیلنے کی خواہش پوری ہونے والی ہے۔
آسٹریلوی کرکٹ ٹیم کے نائب کپتان اسٹیو اسمتھ نے کہا کہ پاکستان میں ہماری سیکیورٹی زبردست ہے اور خود کو بہت محفوظ محسوس کررہے ہیں۔ پاکستان میں کرکٹ کھیلنے کی ہمیشہ خواہش تھی۔
اسٹیو اسمتھ نے کہا کہ اسلام آباد میں مہمان نوازی بہترین کی جارہی ہے، پاکستان ٹیم میں ورلڈ کلاس کھلاڑی موجود ہیں، سیریز میں دونوں ٹیموں کے اچھے مقابلے ہوں گے۔
واضح رہے کہ پاکستان اور آسٹریلیا کے درمیان پہلا ٹیسٹ 4 مارچ سے 8 مارچ تک راولپنڈی میں کھیلا جائے گا، سیریز کا دوسرا ٹیسٹ میچ 12 سے 16 مارچ تک کراچی اور تیسرا ٹیسٹ میچ 21 سے 25 مارچ تک لاہور میں کھیلا جائے گا، سیریز میں شامل چاروں وائٹ بال میچز بھی راولپنڈی میں کھیلے جائیں گے۔
مزید پڑھیں: پاک آسٹریلیا میچز: پی ایس ایل کے بعد کرکٹ شائقین کیلئے ایک اور بڑی خوشخبری
خیال رہے کہ این سی او سی نے پاک آسٹریلیا میچز میں100فیصد شائقین کی اجازت دینے کا فیصلہ کیا ہے، این سی او سی کی جانب سے فیصلے سے پاکستان کرکٹ بورڈ کو آگاہ کردیاگیا ہے۔
ذرائع کا کہنا تھا کہ 100فیصد شائقین پاک آسٹریلیا کرکٹ میچز اسٹیڈیم میں دیکھ سکیں گے، اس حوالے سے این سی او سی نے وفاق اور صوبوں پی سی بی کو مراسلہ ارسال کر دیا ہے۔
