نئی دہلی: بھارت میں طوفان ’’وایو“ آج بھارتی ریاست گجرات سے ٹکرائے گا، طوفان کے زیر اثر ساحلی علاقوں میں آج اور کل شدید بارشیں بھی ہوں گی۔
تفصیلات کے مطابق بھارت میں طوفان وایو (آج) جمعرات کو گجرات سے ٹکرائے گا، بھارتی محکمہ موسمیات نے اورنج الرٹ جاری کردیا، گجرات سے تقریبا 3لاکھ افراد کو محفوظ مقام پر منتقل کیا جائے گا۔
بھارتی محکمہ موسمیات کا کہنا ہے کہ طوفان ممبئی کے ساحل سے جنوب مغرب میں 490کلومیٹر دور ہے، طوفان کے زیر اثر گجرات کے ساحلی علاقوں میں آج اور کل شدید بارشیں ہونگی اور 110کلومیٹرفی گھنٹہ کے رفتار سے ہوائیں چلیں گی۔
طوفان سے گجرات کے ساحلی علاقے سوراشتڑا سب سے زیادہ متاثر ہوں گے، ساحلی علاقوں میں دو دن سکول اور کالجز بند رہیں گے، جبکہ طوفان کے زیر اثر گوا، مہاراشٹرا اور کرناٹکا میں بھی شدید ترین بارشیں متوقع ہیں۔
وزارت داخلہ نے گجرات کے لیے ڈیزاسٹر رسپانس فورس کی 35ٹیمیں روانہ کر دی ہیں اور مہاراشٹرا، گجرات کے ساحلی مقامات پر ماہی گیروں کو سمندر میں نہ جانے کی ہدایات جاری کردی گئی ہیں۔
حکام نے ماہی گیروں کوپندرہ جون تک سمندر میں نہ جانے کی ہدایت کی ہے جبکہ سمندری ساحلوں پر لوگوں کو نہ جانے کی صلاح دی گئی ہے۔
خیال رہے کہ طوفان وایو سے پاکستان میں بھی سندھ کے جنوب مشرقی علاقے بھی طوفان سے متاثرہوسکتے ہیں،ماہی گیروں کوگہرے سمندر میں نہ جانے کی ہدایت بھی کی گئی ہے۔
