واشنگٹن: امریکی اداکارہ اسٹورمی ڈینیلئز کا کہنا ہے کہ امریکی صدر ڈونلڈ ٹرمپ سے تعلقات چھپانے کے لیے جان سے مارنے کی دھمکیاں دی گئیں، ٹرمپ نے اداکارہ کے الزامات کی تردید کردی۔
تفصیلات کے مطابق تند و تیز بیانات ہوں یا نت نئے اسکینڈل امریکی صدر ڈونلڈ ٹرمپ سے متعلق کوئی نہ کوئی متنازع بات سامنے آتی رہتی ہے، اس بار امریکی اداکارہ اسٹورمی نے دعویٰ کیا ہے کہ صدر ٹرمپ سے تعلق منظر عام پر نہ لانے کے لیے ڈرایا دھمکایا گیا۔
اداکارہ اسٹورمی ڈینیئلز نے ایک ٹی وی انٹرویو میں کہا ہے کہ صدر ٹرمپ سے تعلق کو چھپانے کے لیے قتل کی دھمکیاں دی گئیں، دو ہزار چھ سے دو ہزار سات تک صدر ٹرمپ سے تعلقات رہے۔
اسٹورمی نے مزید کہا کہ دو ہزار گیارہ میں اجنبی شخص نے بیٹی کے سامنے دھمکیاں دیتے ہوئے کہا کہ ٹرمپ کو تنہا چھوڑ دو ورنہ جان سے ہاتھ دھو بیٹھو گی۔
وائٹ ہاؤس کی جانب سے امریکی صدر ٹرمپ کے اداکارہ اسٹورمی سے تعلقات کو بے بنیاد قرار دیا گیا ہے، ٹرمپ نے بھی الزامات کی سختی سے تردید کردی ہے۔
امریکی میڈیا رپورٹس کے مطابق ٹرمپ کے پرسنل وکیل مائیکل کوہین کی جانب سے ٹرمپ سے تعلقات کو چھپانے کے لیے 130000 ڈالرز کی خطیر رقم 2016 میں الیکشن سے کچھ وقت قبل اسٹورمی کو ادا کی گئی تھی۔
واضح رہے کہ اس سے قبل میلانیا ٹرمپ کا اپنے خاوند کی ویڈیو منظر عام پر آنے کے بعد کہنا تھا کہ ٹرمپ خواتین کی عزت کرتے ہیں، لیکن وہ اپنا دفاع کررہے ہیں کیونکہ یہ سب جھوٹ ہے، اسکینڈل ٹرمپ کی ساکھ کو نقصان پہنچانے کے لیے سامنے لایا گیا تھا۔
