دہلی: بھارتی ایئرلائن(ایئر انڈیا) کے طیارے میں چیونٹیوں نے یلغار کردی جس کے باعث پرواز 3 گھنٹے تاخیر کا شکار ہوئی، جہاز میں بھوٹان کا شہزادہ بھی سوار تھا۔
غیرملکی خبررساں ادارے کی رپورٹ کے مطابق بھارتی دارالحکومت دہلی کے اندراگاندھی انٹرنیشنل ایئرپورٹ سے لندن کے لیے ‘ایئر انڈیا’ کی ایک پرواز پیر کو دن 2 بجے اڑان بھرنے ہی والی تھی کہ بزنس کلاس میں چیونٹیوں کی بھرمار دیکھی گئی جس کے بعد یہ پرواز تین گھنٹے سے زیادہ تاخیر کے بعد روانہ ہوئی۔
رپورٹ میں بتایا گیا کہ بھارتی طیارے 111-AI کی بزنس کلاس کے حصے میں چیونٹیوں کے جھنڈ نے مسافروں کو بھی پریشان کردیا، وہ اپنی منزل پر مقررہ وقت پر نہ پہنچ سکے۔
چیونٹیوں کی یلغار کے باعث ایئرانڈیا نے جہاز تبدیل کیا اور اس کی جگہ دوسرے بوئنگ طیارے 8-787 کو روانہ کیا۔ اس طیارے میں بھوٹان کے شہزادے جگمے نمگیال ونگچک بھی سوار تھے۔
خیال رہے کہ اس سے قبل رواں سال مئی میں بھارت سے امریکا کے ننیوارک ایئرپورٹ جانے والی ایئر انڈیا کی پرواز کو چمگادڑ کی موجودگی کی وجہ سے ہنگامی لینڈنگ کرنا پڑی تھی۔