نئے سال کا آغاز اسٹرابیری فلڈ کیک سے کریں -
The news is by your side.

Advertisement

نئے سال کا آغاز اسٹرابیری فلڈ کیک سے کریں

آج سال 2018 کا پہلا دن ہے۔ آج کے دن کو خوشگوار انداز سے گزاریں تاکہ پورا سال آپ کے لیے خوشیوں بھرا بن جائے۔ آج اپنے گھر والوں کی تواضع اسٹرابیری فلڈ کیک سے کریں جس سے آج کے دن کی مٹھاس اور خوشیوں میں مزید اضافہ ہوجائے گا۔


اشیا

میدہ: 150 گرام

بیکنگ پاؤڈر: نصف چائے کا چمچ

چینی: 150 گرام

مکھن: 50 گرام

انڈے: 5 عدد

ونیلا ایسنس: 2 قطرے


ترکیب

اوون کو گیس مارک 5 پر گرم کر لیں۔

ایک 8 بائی 8 انچ والا چوکور کیک ٹن لیں۔ اس کی بیس کو بیکنگ شیٹ سے کور کر کے شیٹ کو گریس کریں اور اس پر تھوڑا سا میدہ چھڑک دیں۔

انڈوں کی زردی اور سفیدی الگ الگ کر لیں۔

اب ایک پیالے میں زردی، چینی اور ونیلا ایسنس کو ڈال کر ہینڈ مکسر سے اتنا پھینٹیں کہ کریم جیسا بن جائے۔

دوسرے پیالے میں سفیدی کو مکسر کے ساتھ اتنا پھینٹیں کہ وہ گاڑھی ہو جائے۔

اب زردی والے مکسچر کے اندر بیکنگ پاؤڈر ملا میدے کو تھوڑا تھوڑا کر کے ڈالیں اور اسے مکسچر کے اندر فولڈ کرتے جائیں۔ مکس نہیں کرنا ہے بلکہ میدہ اور زردی والا مکسچر ایک دوسرے میں الٹنا پلٹنا ہے تاکہ ہوا اندر ہی رہے۔

اب آخر میں اس مکسچر میں سفیدی والا مکسچر بھی ڈال دیں اور اسے بھی الٹ پلٹ کریں۔

اب اس مکسچر کو کیک ٹن میں ڈال کر اوپر سے لیول کرلیں اور اوون میں 30 سے 35 منٹ تک یا جب تک اندر سے ٹھیک سے پک نہیں جاتا تب تک بیک کر لیں۔

اب اس کیک کو ٹھنڈا اور سخت ہونے کے لیے رکھ دیں یا فریج میں رکھ دیں۔


فلنگ کے لیے

اسٹرابیریز: 250 گرام

دودھ: 250 ملی لیٹر

کسٹرڈ پاؤڈر: 2 سے 3 کھانے کے چمچ

چینی: 3 سے 4 کھانے کے چمچ

ایک سنگل کریم کا ٹب: 280 ملی لیٹر والا

سٹرابیری جیم: 4 سے 5 کھانے کے چمچ

پانی: 2 کھانے کے چمچ


اسٹرابیریز کے چند ٹکڑے ڈیکوریشن کے لیے الگ رکھ دیں اور باقی اسٹرابیریز کو سلائسز میں کاٹ لیں۔

دودھ میں چینی اور کسٹرڈ پاؤڈر ملا کر اسے اتنا پکائیں کہ جب مناسب حد تک گاڑھا ہو جائے تو آنچ بند کر دیں۔

اب اس میں کریم شامل کردیں اور اچھی طرح مِکس کریں تاکہ کسٹرڈ اور کریم بالکل یک جان ہو جائیں۔

اسٹرابیری جیم میں پانی ملا دیں اور مائیکرو ویو اوون میں ہلکا سا گرم کر لیں۔

اب کیک کو ٹن سے باہر نکالیں اور ٹن کو اندر سے کلنگ فلم سے سارا کور کر دیں۔

کیک کو 2 حصوں میں کاٹ لیں۔ دونوں حصوں کی کٹی ہوئی سائڈوں پر جیم لگائیں۔

اوپر والا حصہ ٹن کے اندر رکھیں۔ اس پر کسٹرڈ پھیلا کر اسٹرابیریز کی تہہ لگا دیں۔

اب کیک کا نیچے والا حصہ اس پر رکھ دیں۔ اس ٹن کو 1 سے 2 گھنٹوں کے لیے فریج میں رکھ دیں تاکہ فلنگ اچھی طرح جم جائے۔


آئسنگ کے لیے

آئسنگ شوگر: 150 گرام

نیم گرم اسٹرابیری جیم: 2 کھانے کے چمچ

جیم اور شوگر کو اچھی طرح مکس کر لیں۔

اب کیک کو ٹن میں سے احتیاط سے نکال کر سرونگ پلیٹ میں ایسے رکھیں کہ نیچے والا حصہ اوپر کی طرف آئے۔

اس پر آئسنگ پھیلا دیں اور ایک طرف رکھی سٹرابریز کو کاٹ کر کیک کو سجا دیں۔

مزیدار اسٹرابیری فلڈ کیک تیار ہے۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

Comments

comments

یہ بھی پڑھیں