The news is by your side.

Advertisement

ٹیکسی میں سفر کرنے والوں کے خلاف سخت کارروائی کی ہدایت

کراچی: سندھ میں ایک شہر سے دوسرے شہر ٹیکسیوں میں سفر کرنے والوں سے متعلق ہدایات میں مزید سختی کر دی گئی ہے۔

اے آر وائی نیوز کے مطابق وزیر ٹرانسپورٹ سندھ اویس قادر شاہ نے سندھ میں لاک ڈاؤن پر عمل درآمد کے سلسلے میں اہم بیان جاری کرتے ہوئے ایک سے دوسرے شہر ٹیکسی میں مسافر لے جانے والوں کے خلاف کارروائی کا حکم دے دیا ہے۔

صوبائی وزیر کا کہنا تھا کہ سندھ سے پنجاب، کے پی اور بلوچستان کے لیے ٹیکسیوں میں 4 سے زائد افراد سفر کر رہے ہیں، محکمے کے افسران اور پولیس ان ڈرائیورز کےخلاف کارروائی کر کے گاڑیاں تھانے میں بند کریں، ایک شہر سے دوسرے شہر جانے والوں کو متعلقہ تھانے سے اجازت نامہ لینا ہوگا۔

کراچی کی 11 یوسیز کو سیل کرنے کا فیصلہ چند گھنٹوں بعد واپس

وزیر ٹرانسپورٹ نے کہا کہ شہری تھانے سے اجازت لے کر ایمرجنسی میں ٹیکسی استعمال کر سکتے ہیں، ایمرجنسی میں بھی ڈرائیور کے ساتھ ایک شہری کو سفر کی اجازت ہے، ٹیکسی میں سفر کرنے والے افراد ایس ایچ او کا اجازت نامہ ساتھ رکھیں گے، اجازت نامہ نہ ہونے پر گاڑی تھانے میں بند کی جائے گی۔

اویس شاہ کا کہنا تھا کہ لاک ڈاؤن میں بلاوجہ کسی کو بھی سفر کی اجازت نہیں ہے، ٹیکسی میں دوسرے صوبوں کو جانے پر بھی پابندی ہے، گاڑی میں زائد افراد کے سفر سے کرونا وائرس پھیل سکتا ہے۔

خیال رہے کہ سندھ میں 24 گھنٹوں میں کرونا کے 93 نئے کیسز سامنے آنے کے بعد صوبے میں کیسز کی تعداد 1411 ہو گئی ہے، گزشتہ چوبیس گھنٹوں کے دوران دو مریضوں کا انتقال بھی ہوا، جس کے بعد اموات کی تعداد 30 ہو گئی ہے۔

Comments

یہ بھی پڑھیں