نئی دہلی: بھارت میں تین سالہ بچے کو نئی زندگی مل گئی، پولیس اور دیگر متعلقہ اداروں نے 8 گھنٹے کی انتھک کاوشوں کے بعد 3 سالہ کمسن کو بچالیا۔
غیرملکی خبررساں ادارے کی رپورٹ کے مطابق بھارتی ریاست اترپردیش کے ضلع آگرا میں تین سالہ بچہ 100 فٹ گہرے کنویں میں جاگرا تھا، اطلاع ملتے ہی متعلقہ انتظامیہ ایکشن میں آئی، عملے نے تقریباً آٹھ گھنٹوں کی محنت کے بعد بچے کو کنویں سے بحفاظت باہر نکالا، خوش قسمتی سے کمسن مکمل صحت یاب ہے۔
بھارتی نیشنل ڈیزاسٹر فورس(این ڈی آر ای) نے حکومت سے اپیل کی ہے کہ وہ آگرا میں دیگر کھلے کنویں کو بند کرے تاکہ مستقبل میں کوئی جانی نقصان ہونے سے روکا جاسکے۔
ڈائریکٹر جنرل این ڈی آر ای کا کہنا ہے کہ دیگر عملے کے ساتھ مل کر ہماری فورسز نے 8 گھنٹے تک آپریشن جاری رکھا جس کے بعد کامیابی ملی، بچے کو معمولی خراشیں آئی ہیں۔
انہوں نے متعلقہ ادارے سے اپیل کی کہ ایسے افراد کے خلاف بھی کارروائی کی جائے جو کنووں کو ڈھانپتے نہیں اور کھلا چھوڑ دیتے ہیں۔ متاثرہ بچے کا مقامی اسپتال میں علاج جاری ہے۔ پولیس نے بتایا کہ بچے کے والدین نے یہ کنواں چھے، سات سال قبل کھدوایا تھا، عارضی طور پر کھلا رہنے کے باعث کمسن اس میں گرگیا۔