کولمبو کے اسکول میں طالب علم کے جوتے سے کوبرا سانپ کا بچہ نکلا جسے دیکھ کر وہ بیہوش ہوگیا۔
غیرملکی خبررساں ادارے کی رپورٹ کے مطابق آٹھویں جماعت کے طالب علم کو اسکول پہنچنے پر سیدھے پاؤں میں چبھن محسوس ہوئی جب اس نے جوتا اتارا تو کوبرا کے بچے کو پایا جسے دیکھ کر وہ بیہوش ہوگیا۔
اسکول انتظامیہ نے واقعے کا پتا چلتے ہی بچے کو فوری طبی امداد کیلئے قریبی اسپتال منتقل کردیا۔
اسپتال انتظامیہ کے مطابق 13 سالہ بچے کو سانپ نے کوئی نقصان نہیں پہنچایا البتہ اسے جلد پر جلن کا احساس ہوا ہے۔
اسپتال انتظامیہ نے بتایا کہ طالب علم کے ٹیسٹ بھی کیے گئے جس میں سانپ کے کاٹنے کی کوئی تصدیق نہیں ہوئی اورخون کی رپورٹ میں بھی زہر نہیں پایا گیا۔
ڈاکٹرز کا کہنا ہے کہ بچے کو چوبیس گھنٹے تک نگرانی میں رکھا جائے تاکہ اس کی صحت کا جائزہ لیا جاسکے۔اطلاعات کے مطابق بچے کی صحت فی الحال بہتر بتائی گئی ہے۔
