ریاض: سعودی عرب میں اپنی نوعیت کا ایک عجیب اورافسوس نا ک واقعہ پیش آیا ہے ، ایک خاتون جس لمحے میں ماں بنیں انہی لمحات میں ان کے شوہر نے دم توڑ دیا۔
تفصیلات کے مطابق سعودی خاتون ام لطین نے جس وقت اپنی نومولود بیٹی کو جنم دیا ، عین انہی لمحات میں زندگی اور موت سے نبردآزما ان کے سابق فوجی شوہر زندگی کی بازی ہارگئے۔
عرب سوشل میڈیا پر وائرل ہونے کے بعد یہ واقعہ خبروں کی زینت بنا۔ خاتون کے شوہر ایک ٹریفک حادثے میں شدید زخمی ہوئے تھے اور ڈاکٹروں نے انہیں ذہنی طورپرمردہ قرار دے دیا تھا، تاہم وہ انتہائی نگہداشت کے وارڈ میں کچھ دن تک زیرِعلاج رہے ۔
جس وقت خاتون کے ایک رشتے دار نومولود بچی کا پیدائشی سرٹیفکٹ بنوا رہے تھے، عین انہی لمحات میں خاتون کے شوہراپنی جنگ ہار گئے اوراس دنیا سے رخصت ہوگئے۔افسوس ناک طور پرخاتون کو بچی کی پیدائش کا سرٹیفکٹ اور شوہر کی موت کا سرٹیفکٹ ، دونوں ایک ہی دن میں ملے۔
ام لطین کےبارے میں بتایا جارہا ہے کہ وہ ماسٹرز ڈگری کی حامل ہیں اور پی ایچ ڈی کرنا چاہتی ہیں۔ تاہم ان کے مطابق ان کے شوہر کو ملٹری سروس سے نکال باہر کیا گیا تھا لہذا وہ سوشل انشورنس پینشن کی حق دار نہیں ہیں اور ان کے لیے اب زندگی ایک کٹھن سفر بن گئی ہے۔
یہ واقعہ گزشتہ برس چار نومبر کو پیش آیا تھا، تاہم رپورٹ اب ہوا ہے۔
