خرطوم: سوڈان کے مختلف علاقوں میں مظاہرین اور سیکیورٹی فورسز کے درمیان جھڑپوں کے نتیجے میں 6 اہلکار ہلاک ہوگئے۔
تفصیلات کے مطابق سوڈان کی حکمراں فوجی کونسل نے منگل کے روز ایک بیان میں ان ہلاکتوں کی تصدیق کی اور مظاہرین کو خبردار کیا کہ وہ تشدد کے واقعات سے باز آجائیں۔
غیر ملکی خبر رساں ادارے کے مطابق عبوری فوجی کونسل کے نائب سربراہ محمد حمدان داغولو المعروف حمیدتی نے بتایا کہ مختلف علاقوں میں سکیورٹی فورسز اور مظاہرین کے درمیان دھینگا مشتی ہوئی اور مظاہرین نے بعض مقامات پر ٹرینیں روکنے اور پل بند کرنے کی کوشش کی ہے۔
تشدد کے ان واقعات کے بعد عبوری فوجی کونسل نے خبردار کیا ہے کہ وہ حزبِ اختلاف کے ساتھ ملک کے مستقبل کے حوالے سے مذاکرات کے لیے تیار ہیں لیکن آج منگل کے بعد افراتفری کا سلسلہ بند ہونا چاہیے اور اس کو مزید قبول نہیں کیا جائے گا۔
فوجی کونسل نے قبل ازیں معزول صدر عمر حسن البشیر کی ایک سابق اتحادی اسلامی جماعت پر مظاہرین کے حملے کی مذمت کی تھی۔
ہفتے کے روز بیسیوں مظاہرین نے خرطو م میں اسلامی جماعت پاپولر کانگریس پارٹی کی جلسہ گاہ ایک عمارت کے باہر جمع ہوکر نعرے بازی کی تھی اور ان کا کہنا تھا کہ اسلام پسندوں کے لیے کوئی جگہ نہیں ہے۔
سوڈان میں معاشی بحران، ابوظہبی حکام کی طرف سے سینکڑوں ملین ڈالر کی امداد
ان مظاہرین کی کانگریس پارٹی کے کارکنان سے جھڑپیں بھی ہوئی تھیں اور ان میں اس جماعت کے 64 کارکنان زخمی ہوگئے تھے۔
